Mga pulong nga makapabuhi sa nagtinga nga paglaom

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Nagkadaghan karon ang mga pulong nga giluwatan sa atong mga opisyal sa kagamhanan nga dili lang makadasig sa katawahan nga ilang gialagaran kun dili nagtangkil pa kini og hingpit nga katumanan sa mga pangindahay nga maayong kapalaran.

Matud pa nila nga ang maong mga pulong sagad kini nga pagaluwatan sa atong mga opisyal sa atong kagamhanan nga kun imong palawoman sa pagsabot daw makabuhi kini sa nagtinga na nga paglaom sa katawhan.

Dugang pa nila nga daghan karon sa atong mga opisyal sa kagamhanan ang miluwat og mga pulong nga makadasig sa katawhan nga maminaw nga makamugna pa sa pagpanghugyaw sa katawhan nga gibati sa tumang kamahinangpon.

Sa mga nasudnong kagamhanan nga opisyal matud pa nila si Presidente Noynoy Aquino maoy nag-una sa labing daghan og giluwatan nga mga pulong nga bisan kun ilang gisabot nga bulatik ug ulog-ulog lamang apan makapalig-on usab sa pagsalig sa katawhan ngadto sa atong kagamhanan. Sama pananglit sa “Kayo ang Boss Ko” nga nagpasabot nga ang katawhan nga iyang gialagaran maoy agalon ug giila nga maoy labing gamhanan.

“Kung walang kurap, walang mahirap” lain kining mga pulong ni Presidente Aquino nga dili lang makapadasig ug makahatag kini og dugang kahugot sa pagsalig sa katawhang Pilipinhon nga iyang gialagaran kay gipakita man niini ang kamatinud-anon sa paggukod ug pagpitol niadtong mga opisyal nga mangawkaw sa salapi sa kagamhanan.

“Walang wangwang” lain nga giluwatan nga pulong ni Presidente Aquino nga makapadasig sa katawhan nga wala’y kalainan sa karaan nga mga pulong nga ginaingon nga “walay kabus o adunahan.”

Gipasabot sa presidente sa nasud nga angay siya nga mahimong panag-ingnan sa mga opisyal sa kagamhanan dili magbutang og siren sa iyang sakyanan kay gipakasama niya iyang kaugalingon sa ordinaryo lamang nga tawo sa katilingban.

Lahi usab hinuon ang pulong nga makapadasig nga kanunay nga giluwatan ni Gobernador Gwendolyn Garcia dinhi sa lalawigan sa Sugbo ug kini mao ang “Dili sulti ang pabuhaton, buhat ang pasultion!” nga nagpasabot nga wala mopasalig sa katawhan sa iyang pagpangalagad apan motrabaho kutob sa mahimo.