Ang pagdaginot sa kuryente

Duha ang katarungan ngano nga angay tang magdaginot. Una, natural aron ta makamenus sa bayranan, nga di maapektahan ang komportableng pagamit ani. Ikaduha, aron dili maubos ang boltahe sa kuryente. Tungod kay ang kapasidad sa kuryente makulang, kun kitang tanan di magpakabana sa hustong paggamit, kita ra sab ang mag-antos sa brown out. Unya kun low voltage o ubos ang boltahe, mangadaut usab ang tanang aplayansis nga gipaandar sa kuryente.

Daghang paagi nga makadaginot ta, sama pananglitan ning mga mosunod: (1) Ang gamitong suga o bombilya kanang CFL o compact fluorescent lamp. May pagkamahal apan dugay mapundir. Gamay rag wattage apan hayag pasigaon. Hinuon, naay barato apan haska pud kadali mapundir og delikado pa. (2) Naa sad roy daghang energy saver gadget, nga itaud sa aplayansis o sa mga outlet o plug. Lainlain kini’g kapasidad, nga naa poy itaud sa circuit breaker o plangka. (3) High-Tech aplayansis ang gamita. Halos tanan ron, duna nay auto-regulated, energy saving devices, delay timer o auto off o mapawong kun di na gamiton. (4) Naa poy mga digital gadgets, nga iplastar sa hawanan, aron pagmonitor sa aktuwal nga konsumo ug ang mabayran na.Busa mamonitor mo ni kada-adlaw. (5) Naa na pud roy mga voltage regulator nga may energy saving device na.

Labaw sa tanan, paghimog regular skedyul sa pamalantsa, ang washing machine ug tanang kitchen ware nga gamita’g kuryente. Dakung butang na ning mga buhata nga makahimo kita sa pagtabang sa pagdaginot sa kuryente. Kun daghan ka’g electric fan nga gigamit, may pang mag-aircon makamenos ka pa.