Naay daghang paagi sa pagsaulog og birthday. Si Nyor Pedring (dili tinuod niyang ngalan) misaulog sa iyang ika-65 kasumaran sa iyang adlaw’ng natawhan pinaagi sa pagpanghatag og lab-as nga mga isda sa iyang mga kabus nga silingan.
* * *
Si Nyor Pedring namalit og balig upat ka banyerang isda nga iyang giapod-apod sa iyang mga silingang kabus diha sa usa ka slum area ning dakbyan.
* * *
“Nyor” ang tawag kaniya sa iyang mga silingan tungod kay matud nila tubig-tubigan na karon si Pedring kinsa sama kanila usa usab ka kabus kaniadto.
* * *
Matud pa sa usa niya ka kanhi silingan si Nyor Pedring usa ka mananagat kon mangingisda sa batan-on pa siya. Gigrasyahan sa Kahitas-an, nagmalambuon sa iyang pagpangisda ug naminyo og taga Negros kinsa anak og negosyante’g buwad.
* * *
Adtong miaging birthday ni Nyor Pedring ikatulo na kadto niyang kaadlawan nga nanghatag siya og lab-as nga isda sa iyang mga kat-timawa kanhi nga silingan.
* * *
Suma pa sa usa ka silingan kaniadto ni Nyor Pedring, kining iyang pagpanghatag og isda atol sa iyang birthday, katumanan niya sa iyang saad kaniadto nga kun magmalampuson siya nga mangingisda iyang apod-aporan ang iyang isig-kapobre og isda -- pamahaw, paniudto ug panihapon.
* * *
Mura ra man kuno tog komedya ni Pedring apan iya kining gituman sa dihang duna na siya’y ikapalit og binanyerang isda.
* * *
TRIVIA. Greetings sa atong mga higala diha sa Banawa ug Guadalupe. Salamat sa inyong way hunong nga suporta sa Banat News.