Eleksiyon sa US

Mga 90 ka mga 20-footer container vans nga gikargahan og Mango brand premium white rice gikan sa Vietnam ang nasakmit niadtong Hulyo 24 ug laing 420,000 ka mga bags nga nagtimbang og 21,000 metric tons sa Indian white rice ang na-imbargo sa Bureau of Customs sa Subic, Zambales niadtong Mayo 15. Ang mga bugas humay gikan sa Vietnam gideklarar nga construction materials, supplies ug gypson board.

Sa laing bahin, ang Philippine Coast Guard sa Bicol mipugong sa usa ka Vietnamese ship nga nagkarga og gibanabanang P200 milyones nga balor sa bugas humay nga gidudahang ipalusot tungod kay wala kini import permit document gikan sa Department of Agriculture.    

Daghan na usab kaayong nanglusot sa Cebu customs nga kadudahang kargamento, apil na ang bugas ug karne, gikan sa gawas sa nasud. Nganong wa man gayud kini mahunong bisan pa sa anti-corruption campaign ni Pres. Aquino? Wala kaha mosiaw kining smuggling aron adunay magamit ang mga politiko nga sakop sa administrasyon alang sa eleksiyon sunod tuig?

* * *

Ang presidential election sa United States (US) himoon karong Nobiyembre 6, 2012. Sumala sa ilang batakang balaud nga ang pagpili og presidente himoon sa unang adlaw’ng Martes human sa unang Lunes sa buwan sa Nobiyembre. Katapusan kining gihimo niadtong Nobiyembre 4, 2008.

Ang nag-unang mga kandidato mao sila si incumbent Pres. Barack Obama sa Democratic Party nga taga Illinois ug si Mitt Romney sa Republican Party kanhi gobernador sa Massachusetts.

Anaay duha ka laing kandidato nga mao sila si kanhi New Mexico Governor Gary Johnson sa Libertarian Party ug (Ms.) Jill Stein sa Green Party nga taga-Massachusetts.

Block voting ang presidente ug bise presidente didto. Sa ato pa ang boto alang kang Obama boto usab ni Bise Presidente Joe Biden. Sama nga ang boto alang kang Romney alang usab kang Paul Ryan. Si James Gray mao ang bise ni Johnson samtang si Cheri Honkala ang kang Stein.

Ang makakuha og 270 sa 538 ka electoral college voters (ECV) mao ang siguradong mapili nga presidente. Ang ECV ibasi sa gidaghanon sa congresional district sa usa ka state. Ang mga dagko mao ang California (55); Texas (34); New York (31); Florida (27); Illinois (21) ug Pensylvania (21). Pareho nga duha ka boto ang tanang mga states alang sa pagbotar og senador.

Niadtong tuig 2000, si Al Gore nakakuha unta og 543,816 ka popular votes labaw sa boto ni Pres. George Bush apan napildi siya (Gore) sa electoral college votes.

* * *

Si Sen. Miriam Defensor Santiago mopasaka og balaudnon nga magbuot nga ang tanang mokandidato kinahanglang mo-file og Certificate of Intension to Run for Public Office (CIRPO), unom ka buwan sa dili pa ang unang adlaw sa pagsang-at sa certificate of candidacy.

Ang maong balaudnon magdili sa buot mokandidato sa pagduso sa mga produkto ug serbisyo; pagtrabaho sa media outfit; ug pagpalit og oras sa radyo, tv ug pahina sa magasin ug pamantaan aron pag-advertise sa iyang kaugalingon. Kun mahimo na kining balaud aduna nay gahom ang Comelec sa paghusgar kun kinsa ang mag-electioneering.

* * *

Kinsa man gayud ang tag-iya sa duha ka Dodge Charger nga ihatag unta ni Bigfoot owner and chairman Michael Gleissner sa Cebu City? Unang gipahibawo ni Kong. Tomas Osmeña nga iya kadto ni Gleissner nga ihatag unta sa siyudad niadtong 2009 sa wala pa ang eleksiyon. Wala kini mahinayon, sumala kang Kong. Tomas, kay dili na man siya ang mayor human sa eleksiyon sa 2010.

Naglibog na ako kay ang atong nasayran nga ang usa sa maong sakyanan gipalit man kuno ni Paolo Osmeña Jacinto, pag-umangkon ni Kong. Tomas, gikan sa Columbian Autocar Corp. sa West Service Road Superhighway sa Parañaque City, Metro Manila niadtong Hunyo 29, dili gikan kang Gleissner. Si Gleissner ba ang tag-iya sa Columbian Autocar Corp.?

Maayong imbestigahon kini sa Ombudsman aron maklaro kining tanan kay naglibog na ang katawhan sa misteryo nga naglimin niining maong duha ka sakyanan nga gigamit ni Kong. Tomas.

* * *

Email: [email protected]