Pag-ila ni Bin Laden

Ning pagtimaan sa ika-11 nga sumad sa pagpangatake sa mga terorista sa Estados Unidos, kun gusto kang mosubay sa kulbahinam nga mga detalye sa pagtultol sa gitagoan ug pagpatay ni Osama bin Laden sa Abbotabad City sa Pakistan niadtong Mayo 2 sa niaging tuig, morekomendar ko sa pagbasa sa bag-ong libro nga “No Easy Day” nga gisuwat sa usa sa mga sakop sa US Navy Seals nga nakaapil sa operasyon.

Ambot tungod ba sa timing sa publikasyon, o sa kauhaw sa publiko sa mas tukmang kasayuran sa pagkapukan sa pangu sa Al Qaeda, daghang namalit sa libro nga nalupig ang halin sa “Fifty Shades of Grey” nga maoy nagdominar sa Amazon sa daghan nang mga buwan.

* * *

Apan gamay’ng pasidaan gikan sa di eksperto nga book reviewer: Dako ang kahigayonan nga manghuy-ab kang magbasa ining libroha. Ang unang walo ka chapters nag-detalye sa lisod nga training ug nahaunang mga operasyon sa Iraq ug Afghanistan ni Mark Owen, ang alyas sa tagsuwat.

Maong mangahas ko pagsugyot nga, kun makahupot ka og kopya sa libro, palihog diretso sa Chapter 9. Nga nag-asoy sa unang pagkatimaho nilang Owen ug kaubanan nga natultolan na sa Central Intelligence Agency (CIA) ang compound ni bin Laden ug gitimbang-timbang na sa White House ipada ba ang Seals o bombardiyohan ang Abbotabad.

* * *

Usa sa labing nakapakugang nako mao ang asoy ni Owen giunsa nila pagseguro nga patay na si bin Laden (girakrakan nila ang dughan dihang nagkisikisi pa human naigo sa iyang paglili sa pultahan sa iyang kuwarto sa ikatulong andana sa bay) ug giunsa nila pag-ila ang terorista (gipahiran nila sa habol ang nagkadugo nga dagway ug giwakli ang iyang bungot aron mabantang ang dagway ug giletratohan sa tanang anggulo).

Mas makapakugang giunsa paghipos ang patay’ng lawas: Gibira nila ang patay’ng lawas gikan sa ikatulo ngadto sa unang andana, nga nalatayan ug naduhigan sa dugo ang patay’ng lawas sa iyang anak nga si Khalid nga nahagba sa ikaduhang andana.

* * *

Tungod sa kaapiki sa luna sa helikopter nga ilang gisakyan pag-ikyas sa mga ayroplanong iggugubat sa Pakistan nga nagkaduol sa Abbotabad ug pagbalik sa US military base sa Jalalaban, Afghanistan, gilingkoran sa usa sa Seals ang patay’ng lawas ni bin Laden.

Pagtugpa sa Jalalabad, gisuwayan pag-ilog sa laing unit sa militar ang patay’ng lawas ni bin Laden. Dihang napakita na gyud sa pangu sa US Special Operations, naneguro si Admiral William McRaven kun si bin Laden ba gyoy napatay: Gipahigda niya ang usa ka sundawo nga may gitas-on nga 6’4” tapad sa patay’ng lawas aron pagsukod kun tupong ba sila.

* * *

Email: [email protected]