Nasulayan na ni Simeon “Sim K” Kintanar ang pag-usab sa dagway sa politika sa segundo distrito sa dihang iyang giatbangan ang gika-intapan nga pamilyang Abines, dugay nang katuigan ang nanglabay.
Karon, buot niyang kuhaon pagbalik ang distrito pinaagi sa pagpapili og balik pagka-kongresista sa 2013, uban ang usa ka “advocacy” nga iyang gipahaum sa kampanya ni Presidente Noynoy Aquino sa iyang pagdagan, limpyo nga pamolitika.
Usa karon sa tinguha ni Sim K nga matisok ngadto sa mga botante, dili lang sa iyang distrito kun dili sa tibuok nasud, ang “politics without money” dungan ang kaligotgot sa nanghitabo sa nangaging eleksiyon nga manglupad ang mga sobreng adunay kuwarta nga hulaton sa mga tawo sa gabii sa dili pa ang piniliay.
Kining iyang adbokasiya nakadawat og suporta gikan sa mga opisyal sa gobyerno, ilabi na sa Department of Education nga nagplanong motudlo niini ngadto sa mga tinun-an; ngadto sa kadagkoan sa Simbahang Romano Katoliko ug sa media.
Sa iyang papel nga nag-ulohan “Cleaning up for a Better Nation” nagsaysay giunsa niya paghulma iyang kampanya alang sa limpyong pamolitika.
Gusto ni Sim K nga masugdan niya ang limpyo ug matinud-anon nga piniliay kay matud pa niya nga kun ang matinud-anon nga kagustohan sa katawhan kinsay ilang pillion masulat lang sa balota, mapili gyud ang mga lider nga gusto sa mga tawo.
Pagkanindot gyud kun mahitabo ang gusto ni Sim K nga mahitabo sa atong nasud. Kadtong mga lider nga walay kuwarta dili na mahadlok nga magpapili ug mobangga sa mga sapi-an nga mga politiko.
Kay sa pagkakaron, nakita ni Kintanar nga kadto lamang tubig-tubigan nga mga politiko ang dali kaayong ma-elect. Makaluluoy kadtong walay kuwarta ug lawom og bulsa kay lupigon sa kuwartahan.
Tinuod kini gisulti ni Sim K. Sa siyudad sa Sugbo lamang, adunay mga tawo nga makamao ug matinud-anon sa ilang pagpangalagad, apan tungod sa ilang kakulang sa salapi nga igong ikagasto sa eleksiyon, mangapilde intawon.
Pananglit wala nay pinalitay sa eleksiyon, kadtong managpakadaog dili usab mapugos sa pagpangawat ug pagpangurakot aron makatigum og minilyon aron igasto sa iyang re-election.
Sumala ba gud, dili na lang kita mopalayo, adunay mga politiko dinhi sa Sugbo nga kusog kaayong manguwarta mao nga dali kaayo silang masublian. Apan kinsay makaluluoy, sila ba nga mga politiko? Dili, ang ilang mga konstituwente gibarat lang nila aron lang gyud makatigum.
Gawas kang Sim K, kinsa kaha ang laing mga politiko nga moparehas niya?
* * *
Puwerte untang dakoa og tulobagon ni Kongresista Tomas Osmeña kun wala pa angkona sa iyang igsuon nga siya’y mipalit sa duha ka US-made nga V6 Dodge Charger nga gimarkahan og Cebu City POLICE unya nagdala pa sa selyo sa Cebu City Government.
Kining duha ka sakyanan idonar unta ni Bigfoot Global Solutions ngadto sa kagamhanan sa dakbayan sa Sugbo, apan sa dihang nasayran sa tag-iya niining si Michael Gleissner nga hapit na mapupos ang termino ni Tomas sa pagka-mayor, wala niya kini idayon.
Kun tinuod nga si Minnie Osmeña ang tag-iya sa maong duha ka sakyanan, nganong dili man siya kasohan og “usurpation of authority” nga dili man siya opisyal ug wala man siya magtrabaho sa kagamhanan sa dakbayan sa Sugbo. Unya, dili man usab siya polis sa Cebu City Police Office.
Apan dili ko motuong si Minnie ang naggamit-gamit sa maong mga sakyanan tungod kay sa sinugdanan, nahibalo na kitang daan nga si Tomas gusto kaayong magpa-polis-polis.
Samtang giangkon ni Minnie nga siya’y tag-iya, giangkon ni Tomas nga ang iyang mga police escort maoy magmaneho niini kanunay.
Apan ang labi nakong gikalagotan niining isyuha, si Land Transportation Office regional director Raul Aguilos nagdumili sa pagkomentaryo sa dihang interbiyuhon unta sa mga sakop sa media kalabot sa pagbutang og wang-wang ug blinker sa duha ka luhong sakyanan sa mga Osmeña.
Tan-awa, kun sa pobre nga mga motorist estrikto kaayo si Aguilos pagpatuman sa mga balaod sa trapiko, ilabi na sa PD 96 nga nagdili sa wang-wang ug blinker sa mga pribadong sakyanan, wala siya ka-ugpo ni Tomas, nahadlok siyang mokomentaryo.
Unya, angay pa tuohan si Aguilos nga mamili man siya og tawo asa niya ipatuman ang balaod?
* * *
Karon nga si kanhi Kongresista Tony Cuenco miretiro na sa politika ug mipahibalong dili na modayon sa pagdagan pagka-kongresista ubos sa Team Rama, mitumaw ang ngalan ni Konsehal Joey Daluz isip iyang hulip.
Pananglit si Daluz ang kuhaon sa Team Rama, dili ba kaha maglisod si Konsehal Bebot Abellanosa? Mag-atubang ra ba kini og dakong isyu kalabot sa mga scholarship grant sa Cebu City Government nga mibenepisyo sa tunghaan nga iyang gipanag-iya?
Dili ba kaha mapugos si Tomas sa pag-junk kang Bebot ug si Totol Batuhan ang iyang sabakon?
Sa pagkakaron, hilom ra ba kaayo si Tomas sa isyu sa scholarship grant nga nasugdan sa dihang siya pa ang mayor sa siyudad.
Mahibaw-an nato kini sunod bulan.