Diosnon si Sec. Jesse

Usa sa mga kinaiya ni anhing DILG Secretary Jesse Robredo mao ang iyang pagka-Diyosnon. Hugot ang iyang pagkadeboto isip Katoliko.

* * *

“Dili lang kay mituman siya sa iyang obligasyon isip usa ka Kristiyano, mipakita pa gyud siya sa mga buhat nga angayan sundon sa ubang Kristiyano.

* * *

Kanunay siya mobisita sa Holy Eucharist labi na kun duna siya’y gusto pangayuon sa Ginoo. Dihang niapil sa swimming competition ang usa niya ka anak babaye, iyang gipahinumduman kini sa pagbisita sa Holy Eucharist una moadto sa dapit sa swimming contest.

* * *

Sumala sa iyang asawa nga si Leni, usa ka abogada, si Sec. Jesse mokompisal sa pari kaduha o katulo matag buwan. Gidayeg siya niini ni Fr. Mario Sobrejuanite kinsa misulti sa sermon niya adtong miaging Domingo nga siya, bisan pari, dili makahimo sa himoon ni Jesse.

* * *

Si Sec. Jesse usa ka tigtabang sa Missionary for the Help of the Poor didto sa Naga City. Gani ang daku-dako sa maong kongregasyon maoy gihangyo sa pamilya ni Sec. Jesse sa pagpahigayon og misa requiem didto sa Basilica Minore sa Naga City.

* * *

Suma pa sa mga katigulangan ni Sec. Jesse bata pa kini deboto na sa Nustra Señora Virgin de Penafrancia, ang patron sa siyudad sa Naga.

* * *

TRIVIA. Maayong buntag sa atong mga higala diha sa Gen. MacArthur Blvd. ug sa pantalan duol niini. Daghang salamat sa inyong pagsuporta.