Goodbye Capt. Bahinting

Husto ang gihimo ni Mayor Michael Rama nga paibanan niya ang supply nga krudo ug gasolina nga ipanghatag ngadto sa mga opisyal ug kawani sa City Hall nga giisyuhan og mga sakyanan, apil na sa mga sakyanan sa barangay.

Sugod Septiyembre 1, tag 100 ka litro na lang ang ihatag nga fuel alang sa usa ka sakyanan sulod sa usa ka buwan. Alang nako daku na kaayo na uy, dili na kana mahurot kun dili lang “ilakwatsa” ang sakyanan.

Ang usa ka litro nga gasolina makapadagan sa sakyanan og walo ka kilometro, ilabi na sa mga bag-o, unya mas taas pa gayud ang maabot sa mga multicab. Kay ang mga sakyanan sa mga department head bag-o man dili kaayo kini kalas og gasolina..

Maayo nga ibanan ang ilang gahin nga gasolina ug krudo kay gamit-gamiton lang nila ang sakyanan sa personal kun daghan sila’g konsumo nga fuel. Tan-awa og unsay gihimo sa usa ka kawani nga giisyuhan og sakyanan sa City Hall nga ang plate number 329, dili ba gigamit hatud-kuha sa iyang mga bata sa tunghaan.

Dia ko’y hulagway nga mga bata nanaug gikan sa sakyanan, dia sa’y diha pa sa sulod kay nagtupad man ang among sakyanan ug gikuhaan nako’g hulagway nga wala siya makabantay.

Dia sa’y laing picture sa sakyanan nga giparada atubangan sa Lahug Elementary School mga alas kwatro sa hapon nga ting-trabaho pa. Nganong naabot man ang maong sakyanan didto sa maong oras?

Apan akong klarohon, wala ko makaila kun kinsa ang giisyohan niining maong sakyanan. Dili nako tumong nga dauton siya ug wala usab ko’y tumong nga siya masilotan. Ang ako lang nga mohunong na unta siya sa pagpahimulos sa higayon kay usa kini ka dakung salawayon.

Matud ni Konsehal Margot Osmeña nga niadtong Biyernes, miadto siya sa usa ka beauty parlor ug gigamit niya ang iyang private vehicle. Taud-taud miabot ang usa ka sakyanan nga may logo pa sa City Hall nga gisakyan og babaye.

Pagkakita sa sakay niini kang Konsehal Margot, wala dayon ni manaug. Nauwaw tingali kay sigurado man nga ang tumong niini mao ang pagpa-gwapa. Oras pa man kadto sa tingtrabaho nganong didto na man siya?

Wala lang motug-an nako si Konsehal Margot kun kinsa ang maong babaye nga sakay sa sakyanan sa City Hall. Pero usa kini sa kamatuoran nga ang sakyanan sa City Hall gamit-gamiton lang sa personal kun daghan ang gasolina. Sagdi lang og ibanan ang konsumo nga gasolina kay ang mga garbage trucks ug sakyanan sa kapolisan, apil na tingali sa mga tanod, dili man iapil.

* * *

“Ang kabililhon sa usa ka butang usahay anha mo ra masayri kun kini halayo na sa imong mga bukton.”

Sa makausa pa natinuod kining maong panultihon ngadto kanila ni DILG Secretary Jesse Robredo ug Capt. Jessup Bahinting. Si Robredo gidayeg kaayo karon kay matud pa matinud-anon sa iyang trabaho.

Apan dunay mga tawo nga milangay-langay sa iyang konpirmasyon sa pagka DILG Secretary tingali tungod sa politika. Si Bahinting gidayeg usab sa katawhan dihang patay na siya.

Nalipay na lang ko kay bisan sa buhi pa siya, gidayeg na nako si Capt. Bahinting pinaagi sa akong kulum tungod sa pagpagamit niya sa iyang eroplano aron makuha sa Camiguin ang anti-venom vaccines ug ika-injection kini kang Ronron Aventurado nga gipaak og bitin nga Cobra.