Mangablit sa pasahero ug mamukong sa PUJ

Daghan ang nag-ingon nga ang mga dispatcher nga masigpatan nga manawag og pasahero sa daplin sa dalan dali kaayong madakpan sa mga polis ug mabalhog sa bilanggoan apan ang mangablit sa pasahero ug mamukong pa sa PUJ lisod pagadakpon ug pabilin kining gawasnon.

Ang maong grupo sa mga batan-ong lalaki kanunay sila nga masigpatan sa daplin sa kadalanan ug kalit kining mosakay sa molabay nga PUJ ug mopasangil sa pagkantakanta.

Human sa ilang pagkanta maoy himoon sa maong grupo sa batan-ong mga lalaki ang pagpangablit sa mga pasahero ug mamugos sa pagpangayo og sinsiyo.

Ang pipila ka mga pasahero nga kabliton dili lang motingog ug dili mohatag apan adunay pipila nga dili sad motingog apan mapugos gayod sa paghatag niini.

Human makadawat ang maong grupo sa mga batan-ong lalaki magdali kini sa pagpangambak sa PUJ nga dili lang gani magpasalamat sa drayber sa giluwanan nilang PUJ.

Kun wala na ang maong grupo sa maong mga batan-ong lalaki mag-iyahay na og bagulbol ang mga pasahero ug masentro sa ilang pagsaway ang mga polis sa pagdagsang niini.

Ang drayber nga gipangutana sa mga pasahero kun nganong wala paningli og plite ang nanganaug nga mangablit nga mga batan-ong grupo sa lalaki nga misakay sa gimaneho niining PUJ igo lamang sa pag-ingon nga naglikay na lamang kini nga ikaaway ang maong grupo. Gibasol sa drayber ang mga polis kay padayon man ang pagdagsang sa maong grupo sa batan-ong mga lalaki nga mangablit sa pasahero ug mamukong pa nga maoy hinungdan sa ilang pagdagsang hangtod niining panahona. (Romeo T. Limpangog)