Ang chief of staff ni Cebu City Mayor Michael Rama nanghulga nga mopasaka og kasong libelo tungod sa akong lindog nga napublikar niadtong Agosto 10 maylabot sa di makiangayon nilang pagpahimulos sa pundo sa dakbayan ubos sa City Hospitalization Assistance and Medical Program kon CHAMP. Matud ni Philip Zafra nga malisyoso ang akong lindog ug gitumong pagbuong sa dungog sa iyang pamilya. Iyang gihimakak nga nakadawat siya og bisan usa ka diyot gikan sa CHAMP. Apan sa samang higayon iyang giangkon nga nangayo siya og tabang gikan sa CHAMP ug gani nahatagan siya og Letter of Authority pagdawat sa kantidad nga P120,582.23 isip hinabang.
Apan sumala ni Zafra nga wala niya madawat ang maong kantidad tungod kay iyang gimanduan ang mga tinugyanan sa CHAMP sa dili pag- process niini tungod kay gusto niyang bayran personal ang ilang obligasyon sa tambalanan. Kun mao nganong nangayo pa man siya og tabang gikan sa CHAMP nga gusto man diay niya kining bayran gamit ang personal niyang kwarta? Sigun sa report sa The Freeman niadtong Agosto 19, ang bayranan ni Zafra sa Chong Hua Hospital diin nalandig ang iyang anak sukad niadtong Pebrero 18 hangtud sa Marso 3 mikabat og P408,094.86.
Kinsa may iyang patuohon nga wala siya kadawat bisan usa ka dako nga siya man mismo ang miangkon nga nangayo og tabang gikan sa CHAMP?
Akong klarohon nga wala ko kaila personal ni Zafra, wala gani ko kakita unsay iyang hitsura. Kun matud niya politika ang motibo nganong ako siyang gikumentaryohan sa akong lindog, nasayop siya. Wa koy labot kun gigamit sa mga kontra sa politika ni Rama ang akong lindog. Ang tataw nga kamatuoran mao nga ilang gipahimuslan ang pundo nga alang unta sa mga kabus.
Gawas pa dili ni maoy isyu, ang tinuod nga isyu mao ang pagpahimulos sa pundo sa gobyerno nga alang unta sa mga kabus. Ang dili makiangayon nga pagbahin sa hinabang gikan sa CHAMP maoy angayang tubagon ni Zafra inay nga manghulga nga mopasaka og kaso batok sa mga sakop sa media.
Pangutan-on nako sa Zafra, dili ba pagpahimulos sa pwesto ang imong gihimo sir? Dili ba diay pagpahimulos sa pwesto ang pagkuha nimo og mas dako nga kantidad sa LOA kay sa mga kabus nga unta maoy tinud-anay nga mga beneficiaries sa programa? Ang mga kabus gilimitahan og P25 mil apan kamo nga mga opisyal sa City Hall miabot og sobra sa P100 mil? Dili ba ni dakong anomaliya?
Niadtong miaging semana dunay usa ka asawa ug inahan nga miadto sa dyLA ug nangayo og tabang kay wala kuno sila hatagi og hinabang sa CHAMP tungod kay way pundo nga magamit. Nganong kun mga kabus maoy mangayo way pundo, apan kun mga opisyal sa dakbayan duna ug mas dako pa?
Ang mga sakop sa konseho sa dakbayan nangayo og listahan sa mga beneficiaries sa CHAMP niadto pang miaging semana, apan nganong hangtud ron wala kahatag og listahan ang buhatan sa mayor? Nahadlok ba sila nga mabisto ang ilang pamakak?
Ang mga opisyal sa gobyerno sama ni Zafra, inay nga magbalat sibuyas, maayo tingali nga mas abli sa mga pagsaway ug sensitibo sa unsay husto ug makiangayon ug dili kay magpakaaron-ingon.
* * *