Panahon na gyud sigurong mamalit ang gobiyerno og modernong abyon alang sa pagbiyahe sa atong mga opisyales sama sa mga sakop sa kabinete sa si bisan kinsang molingkod nga presidente sa nasud.
Kini nakita mismo sa pipila ka mga senador sa Pilipinas tungod sa bag-ohay lang nga nahitabo kang Interior Secretary Jesse Robredo kinsa gikan pa sa iyang ‘official function’ sa Cebu dihang nahagsa ang giabangang pribadong abyon.
Dili lang kini ang unang higayon nga dunay sakop sa kabinete sa presidente sa nasud nga nakalas sa pagkahagsa sa abyon sanglit sa panahon ni kanhi president Gloria Macapagal Arroyo dunay sakop sa iyang kabinete ang nakalas sa crash nga si kanhi Press Secretary Jose Capadocia.
Kini nahitabo niadtong mibisita si Arroyo sa usa ka opisyal nga lakaw sa Benguet. Luwan ang maong mga opisyal sa usa sa mga karaang choppers nga gigamit isip presidential transport.
Ang presidential transport aircrafts sa Malacañang nga maoy sakyan sa presidente sa nasud, mga miyembro sa pamilya niini ug sa kabinete mas maguwang pa itandi kang Presidente Benigno Aquino III.
Naglakip sa mga karaang abyon sa presidential transport planes mao ang Fokker F-28 jet nga gigamit pa kaniadto sa mga kanhi presidente sa nasud nga sila si Fidel Ramos, Joseph Estrada ug Arroyo.
Duna pay usa ka mas karaang abyon ang presidential transport nga Fokker F-27 apan kini dili jet ug dugang mga helicopters nga gi-upgrade lang aron mas moderno ang gamit apan sagad niini mga karaan na usab.
Husto ang awhag ni Senate Majority Leader Vicente Sotto III nga panahon na gyud aron mopalit og bag-ong abyon ang Malacañang aron mas masigurong luwas ang presidente ug ang mga miyembro sa kabinete niini.
Gawas pa usab niini, makamenus ang gobiyerno sa pag-abang og abyon masiguro usab ang kaluwasan sa mga opisyal.
Apan dili kalikayan nga sa matag tinguha sa Malacañang sa pagpalit og bag-ong gamit sa transportasyon sama na lang sa bag-ong mga sakyanan sa presidente ug sa presidential transport aircrafts daghang mga magduda dayon niini.
Tungod kay naglambigit man gud kini og kwarta sa publiko. Bunga kini sa grabeng kurapsyon nga nagpasulabi sa gobiyerno hinungdan sa mga pagduda dili lang sa mga kritiko sa gobiyerno, lakip na usab gikan sa ordinaryong mga magbubuhis.
Bisan sa nahitabo kang Robredo duna pa gihapoy pagduhaduha ang Malacañang sa pagpalit og bag-ong abyon alang sa ilang mga opisyales aron paglikay sa mga kontrobersya.