May puntos si Atty. Antonio Oposa

Mapuslanon kaayo ang gipahayag ni Atty. Antonio Oposa bahin sa kamahinungdanon sa pag-atiman sa environment nga matud pa niya ang tinuod nga Sinugboanong hubad, tuburan sa kinabuhi.

Sa pamalita gud lakturon naman lang pag-ingon nga kalikopan nga usahay ang mogamit sa maong pulong maglisud usab pagpasabot unsa kining kalikopan.

Ang mga damgo ni Atty. Oposa sa pag-edukar sa katawhan nga moamping sa atong palibot nga maoy tuburan sa kinabuhi pinaagi sa paghinlo sa kasapaan, kadagatan, apan pagpalabong sa kakahoyan ug paglimpyo sa mga kanal ug mga estero ning siyudad, mao man kanunay ang gibasal sa mga sibya sa radyo matag  karon ug unya.

Apan ang katawhan nga maoy gipiyalan sa kagamhanan sa pag-atiman niining tanan lisud kaayong kombinsehon pinaagi sa mga pulong.

Ang husto og edukasyon ug may paglantaw bahin sa kalaksot sa pagpatuyang og labay sa basura sa mga kanal ug kasapaan o kaha kadagatan, kaantigo motuman sa iyang obligasyon.

Apan pipila ray por sento niini itandi sa katawhan nga menus og pinsada kansang panglantaw gipunting lang sa kaugalingon nilang bintana sa way pagpakabana nga ang kapakyas nila pagtuman sa balaod bahin sa kahinlo sa palibot, ang tanang tawo sa kalibotan maoy maapektohan.

Ang simbahan nga gipasakopan sa katawhan dako baya usab kaayo og mahimo aron pagpalanog sa ilang awhag bahin sa hustong  sanitasyon.

Kay ang tinuod sa kabukiran ug sa kapatagan ang yano kaayong butang nga mahimong sukdanan kun ang usa ka tawo edukado bahin sa sanitasyon mao ang pagbaton og pansayan.

Apan sa atong nasuta mayoridad sa katawhan way pansayan ug kun mao kini ang matang sa ilang kinaiya, unsaon nato pagtuo nga kaantigo sila mohipos sa tinarong sa ilang basura, nga ang bahin gani sa kaugalingon nilang biya sa lawas di gani sila kaantigo mohipos sa tinarong niini.