Ang baruganan sa anti-RH Bill

Kulatado kaayo sa mga supporter sa anti-RH Bill ang mga banggiitang doktor sa kagamhanan gikan sa kalihim sa panglawas hangtud sa mga nanarbaho sa Department of Health.

Kay matud pa ni Dr. Rene Josef Bullecer, sa Human Life International ug usa sa mga lider sa mga grupo nga nakigbatok sa RH Bill nga puwerti man diay kunong makamatay kining mga pills, IUD ug uban nga gitanyag sa goberno nga ipatumar sa mga magtiayon nga libre aron di manganak.

Si Dr. Bullecer gituohan nga di mamakak ug kun gisulti niya nga kutob sa motumar og mga pills ug mogamit og IUD magmasakit og kanser nagpasabot kini nga peligro diay kaayo kini alang sa mga babaye.

Unya nganong itugot man kini sa mga taga DOH kun kini tinuod man nga makamatay sa mga tawo nga mogamit niini.

Gani bisan ang condom, matud pa ni Bullecer nga delikado gihapon sa lalaki nga mogamit  niini kay may mga sakit nga masinatian sa lawas.

Gipasabot ni Bullecer nga mao kini ang lig-ong katarungan nganong ang mga kaparian ug mga debotong Katoliko dakong supak sa RH Bill.

Kay kun maaprobahan ang maong balaodnon, gahinan sa goberno og binilyon ka pesos ang mga pildoras ug uban pang kontraseptibo nga ipatomar sa mga asawa aron di na makapanganak.

Unya wa ra ba kaayo makadepensa ang mga banggiitang mga doktor sa DOH niini.

Lisud usab kaayong tuohan nga may tuyo silang puohon ang mga asawa o mga babayeng magpunay og tumar og pills   ug mogamit og IUD nga maka-kanser man kaha kini.

Kun pangpatay kining mga kontraseptibo nga gamiton sa RH Law unya , mas maayo baya tingale nga motingog ang taga DOH niini   ug ipamatuod nila nga di tinuod kining maong mga gibutyag sa taga anti-RH Bill.

Kun di usab tinuod ang gipahayag ni Dr. Bullecer, aw mas maayong probahon sa mga suhito sa mga pills, IUD ug uban pang kontraseptibo nga way kamatuoran ang mga pamahayag sa taga anti-RH Bill.