Kadaghanan, atong madungog ang hagit nga magpakahingpit kita sa atong kinabuhi maingon nga ang atong Langitnong Amahan hingpit. Apan sa laing bahin mas makahuloganon kun atong hunahunaon nga ang Dios wala mag-andam og kinabuhi diin dili kita mahilukapa. Hinunoa, gisaad sa Dios ang kinabuhi, diin mahilukapa man tuod kita apan anaa ang dakong kahigayonan sa pagbangon. Ang mahinungdanon mao nga hamtong kang moako sa bisan unsang sayop nga imong mahimo. Ayaw tul-ira ang kinabuhi pinaagi sa pag-ikyas ug paglaylo sa imong sayop. Mas makatarunganon nga imo kining atubangon ug gikan sa maong sayop ipakita mo nga ikaw tawo nga dunay baruganan ug dili usa ka tawong haguka...busa buhata kini:
A. Hinumdomi ang mga higayon nga ikaw nasayop o nakasala. Unsa man ang imong hinanaling reaksiyon? (Imo ba kining giatubang? Niikyas ka ba?).
B. Usisaha ang imong kaugalingon kun unsay imong nakat-onan human sa panghitabo.
C. Aninawa ang mga reaksiyon sa mga tawo nga nahimong naapektohan sa imong sayop. Mapasayloon ba sila kanimo o aduna ba sila’y kasilag nimo?
“Most of us are far sighted about sin. We see the sins of others but not our own...”