Bullet man

Dili ni ang mahitungod sa tawong antingan nga di madutlan og bala. Ang bullet man, tawo kini nga nadutlan sa bala apan buhi gihapon, nga ang bala nagpabilin ra sa sulod sa iyang lawas. Maingon ta nga taas pa gyud og swerte.

“Aylag kahadlok Sir, wa lagi nay kaso.” Nahayblad kos doktor kay may suod kong kailang polis nga tulo na ka adlaw wa gihapon kuhaa ang bala nga naungot sa may ilokan. Gipasabot ko sa doktor sa kahimtang pasyente. Obserbahan pa kuno kun wa bay reaksyon sa lawas nga may bala. Ug may gisugid pa kanako.

Daghan na kunong panghitabo nga mas delikado pa aning sitwasyona. Kay hangtud kuno karon naa pay daghang buhi nga may bala pa, nagpaabot kay lagi obserbahan pa o kaha wa pay ikabayad sa operasyon. Lisud tuhoan, apan may testimonya ang usa ka BIN O police auxiliary nga kauban sa pasyenteng polis.

“Ako bitaw Sir, upat na ni katuig ang bala nga nia sa sud sa akong tiyan. OK raman ko, kay permi man ko magpatsek-ap. Nangita pa lagi ko’g 20 mil pesos para makuha ni. Gilainan man gud kong maghunahuna nga naay bala sa akong tiyan. Matud sa doktor, basta wa lay nadaut sa vital organs nako, wa may kaso.”

May nahibaw-an sad tang retiradong opisyal nga buhi pa, naa gihapon ang mga bala nga mitusak sa lawas. Duna pud tay nabalitaan didto sa laing dapit, nga 17 anyos pa, napusilan og giatiman nga wa na lang kuhaa sud sa ulo ang bala kay delikado operahan. Namatay na ron dili tungod sa bala, kay normal man siyang nagtrabaho isip caretaker sa sementeryo, kun dili tiguwang na, 103 anyos.