AGOSTO 12, 2012: Ikanapulo’g-Siyam nga Domingo sulod sa tuig
Mga Pagbasa: 1 Mga Hari 19;4-8/Sal. 34/Ef. 4;30-5;2/Jn. 6;41-51
Kabahin sa atong tradisyon ang pagpamista. Ang nakadaut lang mao nga daghan sa mga tawo ang modalit sa pagkaon nga tarong niadtong mga tawong pinili segun sa ilang kahimtang sa atong katilingban. Kung dato ug inila, ang labing maayo ug lamian ang ilaha. Ang wala ilhi sa bam-ing pan-os ikaw manghilam-os. Kay lagi, mas tan-awon ang panggawas nga bayhon kay sa tawo gyud mismo nga nagkinahanglan sa maong pagkaon.
Apan ang atong Ginoo lahi. Gihatag niya ang first class sa tanang pagkaon. Gihatag niya mismo ang iyang kaugalingon aron ang tanan, makabaton og kinabuhing dayon. Aron ang tanan, mahiusa kaniya nga kanila nagdapit. Kay ang pagkaon, dili lang sa palami. Hinunoa ang pagkaon nagkahulogan man og pakiglambigit. Kun buot kang malambigit sa Dios tambong kanunay sa iyang bangkite diha sa Sagrada Eyukaristiya.