Ironman sa Lapu-Lapu City (Sugbo)

Dakung garbo sa Sugbo ang gihimong Ironman 70.3 Philippines. Kining maong sports event gipaninguha sa mga kadagkuan sa Lapu-Lapu City, pinanguluhan nila ni Mayor Paz Radaza ug Konsehal Harry Radaza, nga anhi gayud himoa sa Sugbo. Mao usab kini ang gusto sa franchisee nga Sunrise Events Inc. nga ubos kang President Wilfred Steven Uytengsu, Jr., nga usa ka Sugbuanon. Mao nga ang sinugdanan ug katapusan sa maong triathlon didto himoa sa Lapu-Lapu City .

Kining Ironman mao ang ikatulong international sports event nga gihimo sa Lapu-Lapu City. Ang una mao ang duha ka Davis Cups (tennis tournaments) nga gihimo sa Plantation Bay Resort and Spa. Mipalig-on kini sa paninguha sa maong siyudad nga mahimong international sports tourism playground in Asia.

Let's give credit where credit is due. Ang Lapu-Lapu City maoy naghago nga mahimo kini dinhi sa Sugbo. Gihangyo hinoon ang mga siyudad sa Mandaue, Cebu ug Talisay nga moabag kay maagian kini sa magbisikletang apil sa Ironman.

Ang mga pagdayeg ug mga pongpong sa buwak angayan unang ihatag ngadto kang Lapu-Lapu City Mayor Paz Radaza, Konsehal Harry Radaza ug sa taga-Lapu-Lapu City nga hapit kada-adlaw nagtukaw sa pagpangandam alang sa maong international event. Kudos!

* * *

Maka-uuwaw ang mga kongresista, labi na ang mga supak unta sa Reproductive Health (RH) bill nga nangahilum human dapita ni Pres. Aquino og paniudto didto sa Malacañang.    Gisultihan silang P.Noy nga undangon na ang debate sa RH bill kay wa na kini kinahanglana.

Wala ba diay masayud ang mga magbabalaud nga nag-usik-usik sila sa panahon ug salapi sa lungsod ang dugay nga pagdebate niining maong balaudnon inay nga magpanday og mga balaud alang sa pagsulbad sa baha ug lunop nga mikalas na og mga kinabuhi ug miguba sa kabalayan ug inprastraktura?

Angayan pa ba silang pundokon didto sa palasyo ug sultihan sa presidente kun unsay maayong buhaton sa ilang pagka-magbabalaud?

Alang kanako dili na kinahanglang maghimo’g balaud kalabut sa family planning kon pagplano sa pamilya kay naa nay balaud alang niini. Nagduda ako nga ang labing minus tres bilyones pesos ang igahin matag tuig aron pagpatuman sa maong balaud maoy giapas niining ubang mga multinational pharmaceutical firms nga nanghimo niining mga contraceptive devices nga gituhuang nanghatag usab og lobby money kon suborno ngadto sa ubang mga magbabalaud.

Ang labing gikinahanglan mao lamang ang information campaign kalabut sa pagplano sa pamilya inay pag-usik sa salapi sa lungsod nga madapat unta alang sa batakang panginahanglan sa mga Pilipino. Apan unsaon man nga mahadlok man ang mga kongresista nga dili i-release ang ilang P70 milyones nga pork barrel kun dili sila mosanong kang P.Noy. Pagkamaka-uuwaw!

* * *

Ang baha ug lunop nga nanghitabo karon didto sa Manila ug sa tibook Luzon angayang pangandaman sa atong mga politiko. Inay nga pugngan sa mga konsehal ang giproponer sa mayor nga pundo alang sa pagpatuman sa comprehensive drainage system. Kinahanglang kalimtan usa ang politika aron kapugngan ang dakung katalagman nga simbako lang mahitabo dinhi sa ato.

Inay nga manaway sa mga gagmay kaayong sayop sa ehekutibo kinahanglang tutukan sa mga konsehal ang mga problema sa siyudad nga nagkinahanglan og dinaliang pagtagad.

* * *

Ako kanunay'ng ibalikbalik ang leksiyon sa politika sa Mandaue City diin gihurot og lubong sa mga botante ang mga kaatbang ni Mayor Jonas Cortes, gawas lang ang usa ka konsehal, tungod sa ilang kalagut nga walay nahimo nga proyekto ang mayor kay kanunay kining gibabagan sa iyang mga kaatbang sa politika.

* * *

Email: [email protected]