Dalaygon ang gihimo ni Mayor Michael Rama nga pagtabang sa mga kabus nga pamilya aron sila makapasuga sa ilang panimalay ug dili magngiob ang ilang kabalayan karong pasko.
Matud ni City Administrator Jose Marie Poblete nga gipirmahan ni Mayor Rama ang usa ka executive order kaniadtong Agosto 1, 2012 nga aron dili na lisud-lisuron ang mga pobre sa pagkuha og electrical permit.
Ang nakalisud sa pagkuha og electrical permit mao ang rekisitos nga kinahanglang adunay "building plan" ang balay nga aplayan og electrical permit ug mao kini ang nakalisod.
Sagad sa uban, aron lang gayud makakuha og koneksyon sa kuryente, mangawat na lang pagkonektar sa mga linya sa Visayan Electric Company (Veco) ug kun masakpan, kadaku sa kauwawan.
Sa kamandoan ni Rama, pinaagi sa pakigtambayayong sa mga opisyal sa VECO, dili na kaayo estriktohon ang mga pobre, sama nako ba. Aw, hinuon, nakapasuga na ko kay gitabangan 'sab ko ni Atty. Poblete ug ni Engr. Joy Ylanan. Kapin gayud tawon sa tulo ka tuig nga nagsuga lang ko og lamparilya panahon sa gabii. Luoy lagi kaayo, maayo gani kay nakakita si Atty. Poblete sa mapait nako nga kahimtang ug iya ko nga gitabangan. Sa bag-o nga paagi ni Mayor Rama, kadtong mga kabus nga pamilya nga gusto nga magpasuga sa ilang balay, moadto ra sila sa Division for the Welfare of Urban Poor (DWUP).
Ang DWUP mohimo og pakisusi sa ilang kahimtang ug kun masuta nga tinuod gayud sila nga kabus ug nanginahanglan og tabang, ang mayor maoy mohatag kanila og temporary electrical permit.
Dili na sila estriktohon nga pangitaan pa og building plans sa pagtukod sa ilang kabalayan. Kay kun kini himoon, lisud kaayo nga mahatagan sila og electrical permit.
Nindot kini nga lakang sa mayor.
* * *
Kagahapon, nahukman gayud sa Bids and Awards Committee sa City Hall nga i-disqualify ang Aikalami Foods Corporation sa ilang tinguha nga mosuplay og pagkaon alang sa feeding program sa mga tinun-an sa 154 ka Day Care Centers dinhi sa dakbayan.
Ang Aikalami maoy nakahatag og labing barato nga tanyag kay sa laing tulo pa ka suppliers. Subra lang og gamay sa walo ka milyon ka pesos ang tanyag sa Aikalami. Apan unsaon nga basi sa iyang rekord didto sa Securities and Exchange Commission (SEC) dili man kini haum nga mosulod og kontrata nga dinagko.
Unya, nasuta pa gayud ni Atty. Marie Velle Abella sa Technical Working Group sa BAC nga walay business permit ang Aikalami nga nagtugot niini nga maka-operate sila og negosyo dinhi sa dakbayan sa Sugbo. Apan samtang gi-disqualify sa BAC ang Aikalami, ang sunod nga lowest bidder maoy gitan-aw nila nga posible nga hatagan sa kontrata pagsuplay og pagkaon sa mga tinun-an sa Day Care.
Mas mahal pa kini og presyo! Ang isyu gud nagumikan kay ang itlog pwerte kuno nga mahala, apil ang karne sa baboy, ug ang ubang gulay. Pastilan, gidudahan ko nga gisugo kuno sa usa ka supplier nga napilde aron dauton ang Aikalami. Sus, simbako! Wala gayud kana mahitabo. Mahimong linti-an ko karon dayon kun tinuod man gani.
Kalain 'sab, kun ang media mo-imbistigar sa usa ka isyu, sinugo diay sa pikas supplier? Lawgawa ani uy. He! He! He!