Patyon ang RH Bill

Klaro na kaayo nga mayoriya sa mga magbabalaod walay gana nianang giduso sa Malacañang nga Reproductive Health Bill o ang Responsible Parenthood, Reproductive Health and Population and Development Act of 2011.

Usa ko sa mipakpak sa nahitabo. Dili gyud diay mosaler ang paninguha ni Pres. Noynoy Aquino nga pagpadalidali og pasar niining balaora sa dili pa ang 2013 nga eleksiyon.

Niadtong Lunes, ang Kongreso mi-terminate sa debate alang sa RH Bill. Terminate gani, ang buot ipasabot niana giundang sa mga magbabalaod ang panaglalis kun angay ba ipasar o ibasura kanang balaodnon. Sa mga pamantalaan, ang debate giundang tungod sa makabungog (overwhelming) nga suporta batok nianang anti-life, pro-abortion nga balaodnon.

Kun makabungog ang singgit sa mga magbabalaod pagpaundang sa debate, samot na unya kun dad-on na kini sa third reading, ang hugna kanus-a botohan na gyud sa duha ka balay sa Kongreso – ang Kamara Baha ug ang Senado – kun angay ba kining himuong balaod.

Kun makakuha sa saktong boto sa bulag nga botohan, iduso kini sa Malacañang aron pirmahan sa presidente. Mahimo kining balaod 15 ka adlaw human ipublikar kini sa mantalaan nga gipatik ug mabasa sa halapad nga lugar (general circulation) ug sa Philippine gazette. Karon nga mayoriya walay gana nga mahimong balaod kining RH Bill, mosaler kaha ang hugot nga pagduso ni Noynoy unya sa third reading? Depende.

Kun molihok kanang gitawag nila og “lobby fund” unya maduol ang mayoriya sa mga magbabalaod, wala pa kita makahibalo unsay dangatan niining RH Bill.

Apan kun mag-hari ang pagka-Katoliko sa mga magbabalaod ug makasabot nga nahasupak kini sa ilang mga konsensiya, bisan pila ka milyon ang iwasawasa sa ilang atubangan, nagtuo ko nga dili gyud sila madala.

Dili matago ang korupsiyon sa atong nasud, apan nagtuo pa ko nga adunay daghan pa nga motuman sa mando sa ilang konsensiya.

Nag-ampo ko nga niining RH Bill, dili mahaylo sa lobby fund ang mga magbabalaod ug mobotar subay sa gilatid sa ilang konsensiya.