Magpakamatay ka'g frat?

Duna na say sakop sa usa ka fraternity nga namatay human sa hazing. Ikatulo na kini nga biktima sa hazing sud lang sa tulo ka tuig.

* * *

Ang hazing gidili kini sa balaud apan gibali-wala ra ang maong balaud sa pipila ka mga badlungong lider sa mga fraternity.

* * *

Duha ka biktima mga estudyante sa law school, nga sa ato pa abogadohon ug ang ilang frat masters nga mikastigo kanila abogadohan sab o ba kaha mga abogado na.

* * *

Dili ba usa ka dakong irony nga pulos mga estudyante sa pagka-abogado maoy nalambigit niining pagbaliwala sa balaud?

* * *

Komentaryo sa usa ka inahan kinsa nasakit maayo sa nahitabo sa batan-ong biktima sa hazing: “OK ra man unta ang fraternity apan nganong kastigohon man gyud ang ginganlang neophyte atol sa initiation rites? Ug nganong mosugot man sab ang neophyte nga kastigohon, bunalan og paddle, patid-patiran, ug unsa pa diha hangtud ma-ospital ug kun way suwerte mamatay?”

* * *

“Binuang na nang magpakastigo aron lang mahisakop og fraternity,” puno pa ning maong inahan.

* * *

TRIVIA. Maayong buntag sa atong mga higalang magbabasa diha sa Mabolo ning siyudad. Ug sa mga taga Alumnus ug Tagunol, Mambaling. Daghang salamat sa inyong suporta sa Banat News.