Mao ra kini sila anang ginganlan og reflexology, zone therapy, press point therapy o finger massage. Usa kini ka matang o kabahin sa naturotherapy. Pareho ra’g prinsipyo sa pag-alibyo, ang acupuncture nga dagom ang gamiton, samtang ang acupressure pud, tudlo lang ang gigamit niini sa pasyente.
Nasud lang sa hunahuna sa mga tawo niadto nga kun hikapon o tandogon kadtong nagsakit nga parte sa lawas, inanay mawagtang ang panakit. Kining paagiha sa acupresyur, nga namugna gikan sa India, 5000 na ka tuig ang nakalabay. Mas una pa kining nadiskitahan nga makapaalibyo kay sa anang acupuncture didto sa Tsina, nga hangtud ron pipila lang ang nakakat-on niani.
Nganong niepekto man kining buhata? Sa ilang pagtuon, nadiskubrehan, nga ang mga pinong kaugatan o nerves, diha sa kaunoran o ilawom sa panit, may gadugtong sa may mga tumoy nga konektado ngadto sa tanang glands ug organs sa lawas. Sa pagtandog o pagpisil pinaagi sa tudlo diha sa reflex o response zone sa girepresentahang palyadong gland, ayohon kining molihok pagbalik nga normal. Mao nga mawa kadtong panakit nga nakahasol sa lawas.
Pagmatngon anang kanunay magpamasahe, sa pakusog nga pagpisil sa kamot nga ilapnos sa tibuok lawas. Peligro kana kay may madaot o mabugto sa maligsang barado nga ugat o blood clot. Gawas niana, pamaolan ka ug panuhoton ang nabun-og nga kaugatan.
Busa mas luwas ug epektibo kanang pamasahe pinaagi lang sa pagpindot o iduot ang tudlo sa sensitibong parte sa lawas. Kun di kaayo grabe ang panakit, pwede kausa sa semana magpareflex.