Ang kampanya sa paghipos sa basura

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Gihingusgan sa mga lokal nga kagamhanan ang tukmang paghipos sa basura nga maoy hinungdan nga higpit usab nga gidili ang pagpataka og labay sa tuyo nga kalikayan usab ang pagpasad niini sa kadalanan.

Ang matag lokal nga kagamhanan maoy gipalihok sa pagpatuman sa balaod nga Republic Act 9003 kon Solid Waste Management Act of 2001 ang mga barangay opisyal pinaagi sa pag-awhag sa mga molupyo sa pagbahig sa malata ug dili malata nga mga basura.

Ang matag molupyo dili makapataka og labay sa ilang basura bisan kun nabahig na kini tungod kay mag-agad man sa pagkuha sa trak sa basura nga mahidangat sa tagsa-tagsa ka sitio o purok niini.

Nunot sa gihingusgan nga pagpatuman sa paghipos sa mga basura ug sa tukma nga paglabay niini maoy nahimong suliran sa pipila ka molupyo tungod kay matanggong man sa ilang tagsa-tagsa ka panimalay ang ilang mga basura.

Matud pa nila nga sagad sa mga molupyo nga makasinati og kalisod sa paglabay sa ilang mga basura mao kadtong mga panimalay nga pulos sayo nga motambong sa ilang trabaho ang mga nagpuyo niini.

Dugang pa nila nga alas 8 ngadto sa alas 9 na sa buntag nga manggawas ang mga trak sa basura ug mga panimalay nga sayo nga motambong sa ilang trabaho dili na makatayming sa paglabay sa ilang basura.

Gipanghinaut sa pipila ka mga molupyo sa kabarangayan nga kun mahimo sayo unta sa kaadlawon nga manggawas ang mga trak sa basura aron ang mga nagtrabaho nga molupyo makahigayon usab sa paglabay sa ilang basura.

Sa maong paagi nga mosayo ang trak sa basura sa pagpanggawas kahatagan usab og higayon sa paglabay sa ilang mga basura kadtong mga molupyo nga sayo nga motambong sa ilang trabaho ug kalikayan ang pagkatanggong nga mosangko na hinuon ang pangalisbo sa baho. (Romeo T. Limpangog)