Dihay balita nga nag-ingon nga mga 50 porsiyento sa atong kapolisan walay armas kon pusil. Batuta ra tingali apan ning panahuna diin ang mga kriminal pulos armado dili magsilbi ang batuta.
* * *
Adtong miaging adlaw dihay balita nga ang PNP “nangumpra” og mga armas nga nagkantidad og P1.2 bilyones. Maayong balita kini. Basin kaarmahan na ang tanan natong mga polis.
* * *
Kun moabot na ning maong mga armasa gikan sa mga suplayer nanghinaut ang usa tang higala nga kanhi trainer sa pagkupot ug paggamit og armas (hand guns) nga tudloan kon bansayon pag-ayo ang atong mga polis sa paggamit sa armas nga ihatag kun ipagamit kanila.
* * *
Kay dili ba diha toy balita nga kuno daghan sa atong kapolisan ang dili makamao mogamit og pusil. Ug dili makaigo sa target atol sa ilang shooting training.
* * *
Matud pa niining gunhandling trainer nga atong kaila ug higala usik ra ang bilyones nga gigasto sa pagpamalit og pusil alang sa kapolisan kun itakintakin ra kini sa mga polis ug dili gamiton sa mapuslanong paggamit.
* * *
Ang matang sa pusil nga paliton sa PNP giingong taas og kalidad. Sama niini ang mga pusil nga gamiton sab sa kapolisan sa Belgium, Germany, Denmark ug uban pang first world countries.
* * *
TRIVIA. -- Greetings sa atong mga higala diha sa Leon Kilat St. ug Osmeña Blvd. ning dakbayan sa Sugbo. Salamat sa inyong nagpadayong suporta sa Banat News.