EDITORIAL - Mga kabus ug way grado palaanak

Nasuta sa labing ulahi nga survey sa National Statistics Office (NSO) nga mas palaanak ang mga babayeng pobre ug kuwang sa hustong edukasyon itandi sa mga babayeng mas arang-arang nga pagkabutang ug may igong  edukasyon.

Kining puntoha maoy angay tutokan sa pagtagad sa mga ahensya sa gobiyerno nga nag-atiman sa populasyon sa mga Filipino, nag-atiman sa panginabuhi ug maingon man edukasyon.

Dinhi matataw ang tinuod nga nagpaluyong hinungdan sa kusog nga pagtubo sa populasyon sa nasud.

Kay bisan pa kun maaprobahan ang RH Bill, magkatawa lang gihapon ang mga mibabag ning maong balaodnon tungod kay di gihapon kini mosaler hangtud nga di makabaton og maayong panginabuhi ug tukmang edukasyon ang kinabag-ang sector sa kababayen-an sa nasud.

Busa dinhi nakapabor ang mga nagpasiugda sa kampanya pagdili sa magtiayon nga magpugong sa pagpanganak.

Kini tungod kay nadiskobrehan nila ang kaluyahon sa mga Filipina nga gumikan kay kinabag-an niini mga kabus ug mga kuwang sa edukasyon, dali ra kaayong tudloan sa butang nga labing makapakamang kanila sa panginabuhi nga mao ang pagpadasig kanila nga magpadayon gyud sa pagpanganak bisan kun nagkamuritsing na ang kahimtang sa panginabuhi ug pagpuyo.

Sa mga babaye nga may igong panginabuhi ug nakabaton og hustong edukasyon, lisud man silang mailad kay pikatan ka lang sa mata niini.

Sugoon nimo pagpadaghan sa anak sumbalikon ka lang sa pagpangutana kun mohatag ka ba og sustento sa ilang mga ipanganak.

Mao nga subay sa Family Health Survey (FHS) sa NSO di isyu karon ang pagpalabang sa RH Bill o di, kay ang mahinungdanon mao nga hatagan una og hustong edukasyon ang kababayen-an ug hatagan usab og tukmang pundasyon sa panginabuhi.

Kay diha niana, bisan unsaon sila og hulga, magkatawa lang sila bisan og gamiton pa ang ngalan sa Ginoo nga masuko kuno kun moundang sila sa pagpanganak.

Kini tungod kay may igo na silang kahibawo ug pagsabot ug may igo usab nga katigayonan nga makapamalit og kahimanan alang sa pagkontrolar sa pagpanganak pinaagi sa family planning. Di ba?