Dunay SSS apan way contribution kay way trabaho.

Daghan kanato ang na miyembro sa Social Security System kon SSS apan wa makapahimos sa mga benepisyo tungod kay way binuwan nga contribution. Unsay angay nimong buhaton kun gusto nimong ipadayon ang imong pagpa-miyembro sa SSS? Kana nga pangutana ang atong tubagon karon sa atong column.

Dear Atty. Divine,

Good day Atty. Flores, usa ako sa tigbasahan sa imong column sa Banat News ug tigtan- aw sa programa nimo sa TV. Ug na kliyente na sad ko nimo sa gi-file nako nga counter-affidavit ug salamat sa Dios nga na-dismiss na ang kaso. Karon atty naa unta koy ipangutana nimo kay wala man gyu’y makatubag og sakto diri sa amo sa Bantayan Island, mao ikaw na lang ako pangutan- on aron makasiguro ko inig anha nako sa Cebu maka-sure na ako sa ako buhaton, about kini sa SSS atty, last year man gud nakakuha ko og SSS number sa A1 apan wala gyud ni nako nagamit kay wala man koy trabaho, housewife lang ako ug ang gusto unta nako nga magself-employed ko sa SSS. Ang akong pangutana karon kung mokuha ko og self-employed kinahanglan ba nga ang ako gamiton nga number mao gihapon kadtong number nako sa A1? or pwede ko mokuha og bag- o nga SSS number? kay nalimtan naman gud nako ang SSS number nako sa una. Kana lang atty. og kalipay ko nga mahatagan mo ug pagtagad ang akong pangutana. — MILDRED

Dear Mildred,

Salamat sa imong pagsunod sa atong column ug akong gihangop ang imong pag-email kanako kay nagkakita na diay ta kaniadto ug congrats nga na-dismiss ang imong kaso. Akong gitawgan ang SSS Legal Division dinhi sa Cebu City ug akong gipangutana labot sa imong problema. Matud sa SSS nga kun mag self-employed member ka, aduna kay permahan nga self-employed registration form kon RS1 Form unya ang imong dad-on mao ang Barangay Certification gikan sa inyong Barangay Captain diha sa Bantayan Island labot sa imong source of income o imong tinubdan sa income ug pila ang imong income matag- buwan kay mao na ang ilang basihan sa imong monthly contribution, pananglitan certification nga namaligya ka diha og mga isda sa merkado ug uban pang paagi nga ikaw mikita.Ang imong gamiton mao gihapon ang imong daan nga SSS number ug kun nakalimot ka, moari lang ka sa opisina sa SSS pagdala sa imong valid ID kay ilang tan-awon sa ilang computer kun unsa ang imong daan nga SSS number. Mas maayo nga nakahuna-huna ka sa pagpadayon sa imong SSS kay daghan kang benepisyo nga mamahimo nimong kapahimuslan. Busa sa dili pa ka moari sa Cebu City, pagdala daan og Brgy. Certification sa imong source of income kay mao nay requirement nila sa SSS kun mag self-employed ug ang RS1 form diri na nimo na kuhaon og ifill-up sa ilang opisina. Daghang salamat and God Bless. Atty. Divine

Atong gidasig ang mga ginang sa panimalay ug ang si bisan kinsa nga adunay ginagmay nga income sa pagpamiyembro sa SSS isip self-employed aron makapahimus mo sa ilang pa loan, medical benefits, disability benefits, burial ug ang labing importante mao ang pension kun ikaw moabot na sa saktong edad. Kun nahunong ka sa imong trabaho mamahimo sab nimong ipadayon ang contribution sa SSS isip self-employed member. Ang importante lang nga makahatag ka sa binuwan nga contribution aron makapahimus ka sa maong mga benefits.

Alang sa inyong mga pangutana, ipadala lang sa Legal Corner sa Banat News or email sa flores_divina@ yahoo.com og akong tubagon ang inyong mga pangutana matag adlaw’ng Miyerkules og Domingo sa Banat News.