Ang bahad ni Binay

Si Bise Presidente Jejomar Binay misaad nga mobalik siya dinhi sa Sugbo aron pagtabang kang Gob. Gwen Garcia kun suspensohon kini sa Sandiganbayan. Gikiha ang gobernador uban sa kanhi board member ug unom ka laing mga empleyado sa Kapitolyo tungod sa pagpalit sa yuta sa pamilyang Balili nga sobra sa katunga ang anaa sa ilawom sa dagat.

Wala ako masayud kun unsang klase sa tabang ang iyang ihatag sa gobernador apan nagpaabot kini nga nangandam na ang grupo sa gobernador sa pagpugong kang bisan kinsa nga buot mopakanaug niya sa Kapitolyo bisan sa hamubo lang nga panahon.

Unsa man ang hinabang nga ihatag ni Binay? Moapil ba siya sa pagbabag sa mga tinugyanan sa balaud nga maoy mosilbi sa suspension order batok sa gobernador sama sa iyang gihimo sa Makati sa dihang suspensohon unta siya tungod sa kasong iyang giatubang?

Sumala ni Binay nga mokuyog usab kuno si kanhi pangulo Erap Estrada ug si Senate President Juan Ponce Enrile aron pagdepensa kang Garcia. Wala kini problema kun sa legal nga paagi sama sa pagkuwestiyon niini sa korte. Apan kun moapil sila sa mga rally agi’g protesta kun mapakanaug na ang suspension order daw dili kini tukma nga buhaton sa usa ka bise presidente ug senate president.

Mahimong nasayop ang Ombudsman ug ang Sandiganbayan apan adunay mga medyos nga ilang mahimo ug kadangpan dili ang pagkuwestiyon niini sa kadalanan sa bise presidente ug senate president.

Kun mahitabo kini magpakita nga dili na siya motuman sa kasuguan sa Sandiganbayan. Unsa na kaha kun mahimo na siyang presidente. Kuyaw!

* * *

Ambot og motoo ba si Gob. Gwen kang Archbishop Emeritus of Cebu Ricardo Cardinal Vidal sa tambag niini nga dili pa siya andam nga modagan sa pagka-senador? Gitambagan sa cardinal nga dili pa ilhado sa Garcia sa tibook nasud.

Mao tingali nga buot sa gobernador nga mo-advertise sa national television, radyo ug pamantalaan. Apan unsaon pa man ang pagtuman niini nga kontrolado na man sa Liberal Partry (LP) ang sangguniang panlalawigan? Labi na gayud og masuspenso si Gwen.

* * *

Si kinsa man ang mosunod nga chief justice? Among gihisgutan sa tulumanon "Clear Cut Tonight" ang maong isyu. Si The Freeman (nation/world) editor Johnrey Saavedra nakauyon kaayo kang Comelec Commission Sarmiento. Kami si Atty. Fritz Quiñanola nagtoo nga ang matudlo anaa kanila ni acting Chief Justice Antonio, Justice Secretary Leila de Lima ug si Solicitor General Jardeliza.

Daghang mga maayo sa mga aplikante apan sayud na kita kun unsa ang politika. Natural ang nailhan ni Pres. Aquino o kaha rekomendado sa iyang mga alalay dako'g kahigayonan nga mahimong chief justice sa nasud.

* * *

Happy 8th birthday sa akong apo si Kyrone "Kodi" Magdia nga nagsaulog sa iyang kasumaran sa adlaw'ng natawhan niadtong Hulyo 25.  [email protected]