Ang kasingkasing

Dili tanang tawo nga makita nato nga naghigda,nga wala na maglihok, nga makaingon kita nga kana siya patay o namatay na.Sama anang may sakit nga na-coma, mora lang og natulog.

Wa na siya kalihok kay ang nagduma o ang direktor sa pagpadagan sa kalihokan sa lawas, palyado na nga nadaot ang pituitary gland sa atong utok. Kini ang responsable sa pagpalihok sa lawas.

Apan ang maong sitwasyon, basta nagpitik pa ang kasingkasing, dili kana madeklarar nga patay sa doktor. Kay ang namatay niya mao ra man ang iyang kalihokan, dili ang iyang lawas. Busa makadungog kita usahay og panultihon nga, buhi pa pero patay na. Mao nga namasin pa nga magmilagro nga maulian o moandar pa pagbalik ang gahom sa utok.

Bisan tuod may kinabuhi pa ang kasingkasing, sa inanay mopalyar pud kay wa na may maayong sistima nga nagdagan ilawom sa lawas, sama sa pagmintinar nga mahatagan og sustansya ang kasingkasing nga molig-on sa paglahutay. Matud pa, basta buhi pa may paglaum, apan kun patay na ang kasingkasing, human sa pipila ka segundos, wa nay paglaom nga mabuhi pa.

Sa ato pa, labing mahinungdanon kining bahin sa lawas, ang kasingkasing maoy kinahagoan nga mopitik 24 oras o 100,000 ka beses sa usa ka adlaw, ug 36,500,000 sa usa ka tuig. Kapoy kaayo, diba? Ampingi nga di ni mabun-og sa kasuko, konsumisyon, kabalaka, dumot ug tanang sobrang buhat o hunahuna nga makaapektar sa kasingkasing. Kaon ug inom, kanang good for the heart.