Giabibahan ug gidayeg ni Kongresista Tomas Osmeña ang konseho sa dakbayan sa Sugbo tungod sa pagpalabang niini sa ordinansahon nga nagdili kang Mayor Mike Rama ug ni bisan kinsa nga opisyal sa balay lungsod sa pagbaligya sa mga luna sa South Road Properties kun walay pagtugot sa konseho.
Sigun sa hunghong sa akong higalang duwende, ang mga tuta sa kongresista nga konsehal nipalabang sa nahisgotang ordinansahon tungod sa kamandoan sa kongresista kinsa naningkamot pagmaayo nga dili gayod makabaligya sa mga luna sa South Road Properties si Mayor Mike Rama.
Ang mayor gikatakdang mo-veto o dili mopirma sa napalabang nga ordinansahon tungod kay matud pa niya wala na kini kinahanglana apan ang mga konsehal mibahad nga mo-override o mobaliwala sa veto power sa mayor.
Sigun sa Local Government Code ang mga Local Chief Executives sa mga Local Government Units sama sa mga mayor, governor ug kapitan wala tugoti sa pag-entra og kontrata sama sa pagbaligya og propiedad sa ilang mga units nga gipangulohan kun walay pagtugot gikan sa ilang mga konseho. Busa sakto ang mayor. Wala na kinahanglana ang ordinansahon nga gipalabang sa mga konsehal sa dakbayan sa Sugbo.
Tungod sa ka-busy sa ilang pagpangampanya ug mga pulong-pulong nga gipahigayon sa kada sitio sa barangay, wala na makabasa pagbalik sa ilang libro ang mga konsehal. Mao kini ang hinungdan kun nganong nakapalabang sila og ordinansahon nga nag-duplicate o gakopya lamang sa unsa may nahasulat na sa Local Government Code.
Tungod sa ilang kahadlok sa kongresista, ang mga konsehal sa dakbayan misunod na lamang sa pagpalabang sa ordinansahon nga sila mismo nasayod nga wala na kinahanglana. Ultimong ang mga konsehal nga mga abogado wala makapasabot ngadto sa kongresista ug sa ilang mga kaubanan nga balik-balik na ang ordinansahon nga ilang gipalabang gumikan kay nahadlok sa singhag sa kongresista. Nahimo na ba gayong tota sa hingpit sa kongresista ang mga konsehal ning dakbayan?