EDITORYAL - Ang paglipang sa gidiling drugas

Ang kaso sa gidiling drugas dinhi sa nasud nag-anam pagkaylap ug wa nay higayon nga mapugngan pa.

Kini tungod sa kadagko og kuwarta sa mga nagpadagan niini ug nga sayon kaayong mopatak-om sa mga mata ug baba sa mga tawong anaa sa ilang palibot.

Gani giingon sa mga tigpaniid nga kutob sa mga tawong suod sa mga drug lord basta mosuporta lang kini kanila seguradong mabahinan gyud sa ilang sapi.

Maoy hinungdan nga gumikan sa kadaghan nilang sangga lisud silang dakpon, ug kun madakpan man ugaling, nagpasabot nga wa kini molawog sa mga tawong angay nilang tingalon sa ilang sapi.

Karong panahona angay naman gyud unta nga masumpo na sa hingpit ang maong problema.

Tungod kay usa kini sa hinungdan sa pagdagsang sa mga pintas nga krimen sama sa tulis, lugos, kawat, pagpatay ug uban pa.

Usahay mapagan ang mga tawong nagtinarong sa pagpakabuhi kay tulison, patyon, lugoson ug uban pang matang sa krimen nga mugna sa utok sa mga adis-adis.

Sa kadaghan sa mga negosyante og shabu maglisud ang kapolisan sa pagsikop   kanila kay ang uban idlas ug abtik kaayo, samtang ang uban kuwarta ang gihimo nilang proteksyon.

Nasayud sila nga ang gahum sa kuwarta lisud hitupngan busa kun molihok sila labaw pa sa politiko.

Ang politiko kun mosuborno sa tawo , buhis ra man usab sa katawhan maoy ilang gamiton paglukmay sa konsensya sa botante samtang ang mga drug lord halin sa baligya nilang illegal drugs ang ilang itingal sa mga tawong buot makigkontra kanila.

Ang suborno sa mga politiko maoy paon aron ang masubornohan nila mobotar kanila, samtang ang suborno sa drug lord para sa mga mananakop aron moprotiher kanila. Busa kun aduna may mga Polis, NBI, PDEA ug uban pa nga makig-abin sa mga drug lord , atong iampo nga ang ilang asawa ug mga anak babaye unayon og lugos sa mga adis-adis ug ang ilang mga anak nga laki patyon sa mga adis-adis. Di   ba?