EDITORYAL - Ang kaisog sa Filipino gipaabot sa China

Gipanid-an lang sa China kun unsa kaisog ang mga Filipino sa pagprotehir sa kabtangan niini.

Di gusto ang China nga laing nasud ang manghilabot sa kabtangan sa Pilipinas sama sa mga isla niini nga nahisakop sa Spratly Islands, Scarborough Shoal ug uban pa.

Sa nakita sa China   nga bahag kaayo ang ikog sa mga Filipino sa gihimo nilang pagbirig-birig sa mga kabtangan sa   mga Pinoy nga anaa sa West Philippine Sea, busa migara sila.

Kini tungod sa pagtuo nila nga kun may laing nasud ang mosuway og hulga sa Pilipinas aron ilogon ang mga kabtangan niini mailog gyud kay talawan man kaayo ang mga Filipino.

Usa sa nakapatalaw niini mao ang kakuwang sa mga kahimanan sa gubat , busa bisan yatakan na ang iyang katungod mokupoy ug mohilak dayon iparuk-parok ang bagul-bagol sa bongbong.

Maoy hinungdan nga dihang nakita sa China nga ang taras sa mga Filipino maayo lang sa patisoy, migara sila sa paghadlok niini kay kun mopadayon ang pagbahag sa ikog sa Pinoy, aw ilahon na lang gyud ang mga kabtangan niini.

Ang gusto sa China nga mahisama ang Pinoy sa Russia, nga dihang misuway sila og lapas sa teritoryo sa mga Ruso sa ilang kahakog , kaabusado ug katikasan, gibirahan dayon sa mga sundawo sa Russia ug namatyan   sila, hala usab pa mo?

Mao man unta nay tinuod gyud nga pagkatawo sa mga Filipino nga sama sa mga Ruso o kaha labaw pa ang kaisug sa mga Pinoy kanila.

Ang tinuod, ang bangi karon sa mga Filipino ug China sa gipakita sa mga Insek nga kaabusado nila, mahimo untang sama sa usa ka kalma kaayong tawo nga nagkagidlay lang apan dihang   gisuwayan og paregla sa mga maldito, kalit lang kining mihiwasa ug miarangkada sa pagsukol sa namaregla, busa mibahag ang ikog sa mga malditong kontra .      

 Pero ambot lang sa tinuod nga panghitabo, kun makahimo ba ang mga Pinoy niini nga panguyawan man kini mopakita og kaisug basin iwisi-wisi siya sa mga Insek.

Ang gipaabot sa mga Pinoy nga   Estados Unidos ang maoy mosalida batok sa China ug igo lang silang mosuporta , pakyas man tungod kay naminghoy ug sila maka-arti batok China. Di ba?