Nakugang ko pagkahibawo gikan sa among administrative officer unsay mga panginahanglan sa mga aplikante pagka reporter. Kun samang mga panginahanglan pay gipahamtang sa pagsugod nako sa media, di gyud unta ko madawat. Inay mag-atubang og mikropono matag adlaw, nga maoy akong trabaho karon, daro ug kabaw tingali unta ang kaabag isip mag-uuma sa Bohol, nga sukad pa niadto maoy akong giisip nga alternatibong panginabuhi, o nabalhog na sa prisohan, kun gipaundayonan pang pagka aktibista.
Ambot unsa kakuti ang pagsud og trabaho sa mga pamantalaan karon. Labi na sa pagsuwat og lindog. Mas lisud gyod tingali. Kun pasikarang email nga akong nadawat nga nangutana pilay bayranan pagpagawas sa iyang sinuwat sa pamantalaan.
* * *
Di hinuon monopoliya sa kabag-ohan ang kakuti sa pagsud sa media. Mga magsisibya nga nag-una namo nisugilon nga tigkutaw lang sila og kape ug tigpalit og sigarilyo ug nagsige lang og atang-atang sa sibyaanan sud sa pila ka tuig sa wa pa hatagi og luna sa drama o programa sa radyo.
Usa sa mga sugilanon ni anhing Cerge Remonde nga di nako makalimtan mao ang iyang pagpangaplay pagka reporter sa Philippine News Agency: Gikumot sa editor nga way basabasa ang iyang labing unang sinuwat; gisugo siya pagpangita og laing balita sa way pagpasabot unsay sayop sa una.
* * *
Labihang sayona nakong nakasud sa DYLA. Gidawat ko bisan way application letter. Nga nakapalipay pag-ayo nako. Kay wa man tubaga bisan sa daghang buwan nga pinaabot ang nahauna nakong aplikasyon sa laing sibyaanan.
Mas sayon ang akong pagsugod og suwat sa The Freeman. Wa mi makinilya sa tinun-an pa ko sa Talisay Malayan Academy maong sinuwat sa kamot ang labing una nakong tampo. Inay kuti-kutihon, gidawat ni Sir Juanito Jabat ug giawhag ko niya sa pagpadayon pagsuwat. Daghang salamat sa iyang pagdasig, wa na gyud ko mohunong pagsuwat ug pagpangita og kapahungawan sa akong mga panahom sukad niadto.
* * *
Mas sayon ang pagsugod og sibya ug suwat karon. Wa na kinahanglana ang sibyaanan o pamantalaan. Makahimo na si bisan kinsa og live streaming ginamit ang YouTube, Ustream, Stickam, Qik ug ubang libreng providers. Makahimo na si bisan kinsa pagsugod og pahina o web log pinaagi sa Facebook, Google+, Blogger, WordPress, Wikipedia ug ubang libreng plataporma.
Apan wa gihapoy bugti ang talagsaong kahigayonan sa pagsuwat alang sa The Freeman. Ang pagkahimong kabahin sa labing karaang pamantalaan sa Sugbo, sa pagsaksi ug pagtabang sa paghubad sa pakigbisog ug kasaysayan sa mga Sugbuanon sukad sa nagdagtom nga diktadura hangtod sa bag-ong mga pagsuway ug ang pagkahimong tipik sa higante ug tawhanong bantayog sa kamatuoran, maoy labing lunsay nga gasa. Nga di kabayran og bisan unsang katigayonan.
* * *
Email: leo_lastimosa@abs-cbn.com.