Sukwahi sa gipatuo sa uban, ang United Seniors Citizens Multi-Purpose Cooperative of Cebu City, Inc., wala ug dili in trouble. Daku pa kining buhi ug stable kaayo.
Kamatuoran niini, ako mismo nakautang na. Ug duna kini Certificate of Good Standing gikan sa Cooperative Development Authority (CDA), otherwise, kun in trouble pa kita, dugay na kining gipatak-opan sa CDA.
Ug sa atong pakisayod, mahimo nga mo-issue sila og Special Certificate of Good Standing, aron maka-import kita’g tambal gikan sa mga nasud nga barato og tambal, sa higayon nga ma-operational na ang gilaraw nga botika sa mga senior citizens.
Daghan ang nangutana ug nangumusta sa status sa atong cooperative. Sa ako nang giingon sa unahan, wala kitay angayan kabalak-an. Ato lang pahinumdoman ang mga sakop niini nga sa pagkakaron, giisip pa nga mga associate members lamang tungod kay igo lang silang mibayad sa membership fee nga P200, apan, wala mobutang sa share capital nga tag P2000 matag miyembro.
Busa, maayo nang ma-regular member na, aron makapahimulos sa mga benepisyo nga mahatag sa cooperative. Angay hinumdoman nga lahi sa corporation, ang tag-iya sa cooperative, dili ang mga capitalista kon mga tag-iya sa capital, kondili ang mga sakop mismo, diin ang highest governing body, dili ang Board of Directors, kondili, ang mga sakop mismo .. ang General Assembly.
Sa ato pa, kun maghisgot kita’g paglampos sa kooperatiba, ang makapalambo niini, mao ang mga sakop mismo … ikaw ug ako. Akong awhagon ang mga chapter presidents pagpahinumdom sa ilang mga miyembro nga nagpasakop sa kooperatiba, pag-update sa ilang membership.
Ug kadtong buot magpa-sakop, mo-conduct kami og mga pre-membership seminar diha sa inyong mga barangay. Tawag lang kanila ni Lita Lumibaw, ma-contact siya sa Labangon Barangay Hall, Tel. 4145784, o kang Vita Padilla sa dyRC, tel. 4125289, 2388173.
Sa atong nasayran, si Mayor Mike Rama mo-provide kanato og opisina sa Coop … alang usab unya sa gilaraw nga botika sa mga senior citizens.
Akong usbon, ikaw maoy makapalambo sa atong kooperatiba. Mao man gani hinungdan nga medyo hinay ang dagan niini, tungod kay bugnaw ka man kaayo, ug wa lang magpakabana. Sa kadaghan nato, walay katarungan ngano dili kita magmauswagon. Abtik kaayo tang modawat sa cash assistance, apan luya kitang molihok pagpalambo sa atong kapunongan.
Working together baya unta ta. Sa libro nila Gil Y. Garica ug Marie Ann Guanzon giulohan og Book on Cooperatives, giingon dinhi, atong kutloon, unsa ang cooperative: “Simply, it is a group of people working together, in cooperation with each other, helping each other, for a common good. The concept is as old as mankind itself. It is just impossible to imagine how man survived through the ages if they did not help one another.”
Busa, kun nangutana ka kun naunsa na ang Seniors Coop, ikaw ray makatubag niini.