Usa ka maayong lakang ang tinguha nga pag-regulate sa mga habal-habal nga nagdagan sa pagserbisyo sa mga pasahero nga mopaingon sa kabukiran ug hilit nga mga lugar dinhi sa nasud.
Si Magdalino Retisa, 35 anyos, minyo nga taga Poblacion Occidental sa lungsod sa Consolacion nga kapin na sa napulo ka tuig maoy usa lamang sa daghan pa nga mga habal-habal drayber nga mipadayag og pag-uyon sa pag-regulate sa kagamhanan sa mga habal-habal.
Gipasabot niya nga ang pagmasahero sa habal-habal maoy iyang gibuhi sa iyang asawa ug tulo ka mga anak nga ang duha pulos na nagtungha sa elementarya.
Matud pa niya nga kaugalingon niyang motorsiklo nga maoy iyang gihimong habal-habal nga ang kuwarta nga iyang gipalit gikan sa gitrabahoan niya kaniadtong pabrika sa rattan nga misira na niining panahona kay ang tag-iya mitakli na ngadto sa laing negosyo.
Giangkon ni Magdalino nga ilegal ang maong matang sa iyang panginabuhi tungod kay wala pa man makapalabang og balaod ang kongreso nga nagtugot na sa maong matang sa ilang panginabuhi.
Dugang pa niya maayo gayod unta nga ma-regulate sa goberno ang mga habal-habal tungod kay nagpadayon man karon ang pagdagsang sa mga habal-habal nga namasahero niining panahona ug magpataka na lang og sulod sa ilang pagpamasahero.
“Ang nakapait kay gihimo na lang pasangil ang pagpamasahero isip habal-habal alang sa dautan nilang katuyoan,” pamahayag pa niya.
Gihimo nga pananglitan ni Magdalino ang nahitabo sa usa ka 17 anyos nga dalagita nga pasahero sa habal-habal nga ang drayber mao lamang usab ang naglugos pinaagi sa pagdala niini ngadto sa hilit nga lugar sa dakbayan sa Mandaue.
Sa nasayran nga gipalabang ni Baord Member Thadeo Ouano sa ikaunom nga distrito sa lalawigan sa Sugbo ang ordinansahon nga nagtinguha sa pag-regulate sa operasyon sa mga habal-habal.
Maoy tuyo ni Ouano nga kahatagan usab og insurance coverage ang mga pasahero isip pagpanagana sa panahon nga makasinati kini og aksidente. (Romeo T. Limpangog)