ARANGKADA Ni Leo Lastimosa

Niabot og 72 ang tanang nangaplay ug girekomendar pagka chief justice sa Korte Suprema. Puli ni kanhi chief justice Renato Corona nga nakonbikto sa impeachment trial nga gipahigayon sa Senado. 25 ang nidawat sa nominasyon ug moatubang sa Judicial and Bar Council (JBC). Nga maoy mohimo og mas mubo nga listahan sa labing takos ug haom nga mga aplikante.

Nagpadayon ang sibaw nga pasangil nga si Presidente Noynoy Aquino ang motudlo og chief justice nga motugot sa iyang hingpit nga pagkontrolar sa labaw’ng hukmanan. Ang pasangil giluwatan bisan sa wa pa matangtang si Corona. Wa tuohi sa katawhan niadto. Isalikway sab nilang pasangil karon.

* * *

Kay gisunod ang tanang lagda sa pagpili sa bag-ong chief justice. Ang JBC, kansang mayoriya sa mga sakop independente gikan sa Malakanyang, maoy nidawat sa mga nominasyon ug mga rekomendasyon. Si Presidente Aquino di makadiktar kinsay iapil sa listahan. Di siya makatudlo ni bisan kinsa nga di malista sa JBC. Way lagda nga nalapas.

Samang gituman ang mga lagda sa pagpalagpot ni Corona. Gisubay ang tanang lagda sa impeachment process sa duha ka bay balaoranan sa Kongreso. Bisan sa pasangil ni Corona nga diktador si Aquino, wa kandadohi ang iyang buhatan, wa pig-oti ang iyang mga protesta ug mga pakigpung, wa pahiloma ang iyang mga dumadapig.

* * *

Di angay’ng basulon ang impeachment ni Corona sa kadaghan sa mga nominasyon nga nadawat sa JBC. Way lagda nga nagpugong ni bisan kinsang magbubuhis sa pagrekomendar ni bisan kinsang abogado pagka chief justice. Pasidungog o bugalbugal man ang katuyoan, di mahimong barawon ang mga nominasyon sa way paglugpit sa katungod sa mga niapil sa proseso.

Di ang tanang 25 nga nidawat sa nominasyon dasonan sa JBC. Human masukitsukit atubangan sa nasudnong telebisyon, nga salamat sa mas taas nga sumbanan sa transparency mahitabo sa labing unang higayon sa kasaysayan, kasagaran nila masalikway ug di igkita sa listahan sa moabot sa lamesa ni Aquino.

* * *

Way makalalis sa katungod sa mga dumadapig ni Corona, nga taguon lang nato sa ngang Gloria Arroyo ug iyang mga turutot, pag-awhag ni Presidente Aquino pagsalikway sa gitumbok nilang mga kaatbang ni Corona. Nga naglakip nilang Acting Chief Justice Antonio Carpio ug Justice Secretary Leila de Lima. Samang way makalalis sa katungod ni Aquino pagtudlo ni Carpio. O de Lima. Gawas lang kun di maapil sa listahan sa JBC.

Klarong katuyoan sa kampo ni Arroyo. Human napakyas paglansang ni Corona sa Korte Suprema, lawgawon na lang ang matag lakang sa proseso paghulip niya. Nangiyawat nga may mopilit sa bisan unsa na lang lapok nga ilang gilabay. Klarong nakalimot nga ang bakak nga maoy nakapatagak nila di mahitabong mao na say sukaranan pagbalik sa gahom. 

* * *

Email: [email protected]