Abot sa dunggan ang ngisi sa mga senior citizens niadtong Lunes ug sipa kaayo ang ilang pagakpak sa dihang nabati gikan ni Mayor Mike Rama sa gipahigayon niining State of the City Address ang dakong kantidad sa financial assistance nga ilang madawat gikan sa kagamhanan sa siyudad.
Ang mayor nagkanayon nga human madawat sa mga senior citizens sa dakbayan sa Sugbo ang tag tulo ka libo ka pesos nilang financial assistance kaniadtong miaging buwan, makapaabot pa sila og dugang upat ka libo ka pesos inig abot sa buwan sa Disyembre ug sa sunod tuig tag napulo ka libo ka pesos na gayod ang ilang madawat nga financial assistance gikan sa siyudad. Gani laraw sa mayor nga himuon niyang napulog duha ka libo ka pesos ang ihatag nga financial assistance ngadto sa mga senior citizens sa siyudad sa Sugbo aron kada buwan na gayod sila makadawat og tag tagsa ka libo ka pesos nga financial assistance sa siyudad. Dili sama karon nga magpaabot pa sila og tag pila ka buwan una pa nila madawat ang ilang financial assistance.
Makabungog ang pagmahal ni Mayor Mike Rama ngadto sa mga senior citizens sa dakbayan maong ila usab kining gisuklian og makabungog nga pagakpak ug mga pagpasalamat.
Apan kun nagpasalamat ang mga senior citizens ngadto ni Mayor Mike Rama, angayan usab silang magpasalamat ngadto ni Kongresista Tomas Osmeña gumikan kay kun dili pa tungod sa kongresista dili ingon ani ka manggihatagon si Mayor Mike Rama. Nahagit man ugod ang mayor dihang gipasalig sa kongresista ngadto sa mga senior citizens nga himoon niyang tag napulo ka libo ka pesos ang ilang financial assistance kun makabalik siya pagka mayor. Natural ang kongresista mipagawas usab sa iyang pasalig dihang gihimong tag pito ka libo ka pesos ni Mayor Mike Rama ang financial assistance sa mga senior citizens. Busa ang duha ang angayan nga pasalamatan tungod kay sa ilang pamolitika ang mga senior citizens ang nabulahan.