Unsa kahay sentimento sa mga vendor niining tinguha ni Cong. Tomas Osmeña nga mobalik pagka-mayor sa siyudad sa Sugbo. Kaniadto god gidid-an sa pagtinda og isda diha sa Pasil ug Carbon ang taga Talisay, Mandaue, Lapu-lapu, Cordova ug kadtong dili taga dakbayan sa Sugbo. Duna kadtoy taho nga hinginlan ang mga naninda’g buwad sa Tabo-an public market nga dili botante sa siyudad. Maayo gani kay ang hayopan sa probinsya ipaihaw diha sa Cebu City Modern Abattoir.
* * *
Nahilom kadtong hulga sa mga fish vendor sa Pasil nga gub-on ang maong dapit aron himoong plaza o parke ug sa atbang tukoran og eskuylahan. Limpyohan ang maong lugar aron usab maplastada ang nataran sa karaang simbahan sa San Nicolas de Tolentino. Niining ulahi nahilom ang giingong demolisyon kay ang Pasil Fish Market giingong padak-an ug panindoton. Sa pagkakaron god hugaw ug baho kay walay nag-atiman sa pagpanglimpyo sa maong merkado nga maoy giisip nga fish trading center sa taga probinsya.
* * *
Kun patahomon ang Pasil Fish Market, maayo sab tingali nga masumpo ang tinunto sa pipila ka mga vendor. Ang dubok nga mga isda nga dili na madala og humol sa ice ilang palutson pinaagi sa pagbutang og anyel ug formalin. Tagod-tagoron ang mga dagkong isda ug trapohan sa dugo gikan sa lab-as nga isda aron konohay presko tan-awon. Asa naman diay ang mananakop lakip na ang pagsakmit sa limbongan ug tikasan nga timbangan.
* * *
Ang mga dagkong dealer sa isda mao diay mosuplay sa mga mall ug dept. store. Sa ato pa barato ang presyo sa mga isda sa Pasil, Carbon ug ubang merkado kun itandi sa mga dagkong tindahan. Unsa sab ka tinuod nga ang dili mahalin sa mga mall ug dept. store dad-on og balik sa merkado ug ibaligya kini nga hinumolan na sa anyel. Maarang-arang ang anyel kay sa formalin.
** *
Gitagan-an gyud og luna ug panahon ang mga vendor sa Carbon Market. Makaladlad sila sa ilang mga baligya gikan sa alas 6:00 sa gabii hangtod sa alas 6:00 sa buntag sa mga dalan MC Briones, Calderon, Magallanes ug V. Gullas (Manalili). Daghan ang mamalitay kay barato nga gikan pa gyud sa umahan nga gitumod sa mga biyahedor. Kini naglakip sa mga utanon, lamas, lagotmon, bulak ug uban pang produkto gikan sa mga mag-uuma. Daghan ang mga vendor nga nabulahan sa kubalon nga mga kamot ug tiil sa mga magbabaol. Giingon, “the farmers are the backbone of the nation”. Basin maapil niini ang akong amahan kay usa man ka mag-uuma. Magsisibya pod siya ug manunulat.
* * *
Maayo tingaling subayon sa OBO kanang building nga nasunog atbang sa NSO sa MJ Cuenco Avenue . Gitapakan lang og finishing nga semento ang konkretong bongbong. Gabok na kini kay nasubhan sa dihang gipasiritan og tubig sa bombero ang miulbo nga kayo. Kuyaw kini malusno ilabina ang LGC Marketing mobalhin na sa MC Arthur hinoon wala may vendor sa palibot. (tmj_aniscal@yahoo.com/0906-648-9637)