Naandan na sa atong mga opisyal sa kagamhanan ang pagpasiugda og mga relihiyosong seremonyas ug pagladlad sa mga religious symbol sa ilang mga buhatan nga maoy hinungdan nga daghan ang mipadayag sa ilang pagsupak sa gisugyot nga Balaudnon ni Kabataan Partylist Representative Reymond Palatino.
Nunot sa hugtanon nga pagsupak adunay miingon nga kun buot hunahunaon ang pagpahigayon og seremonyas ug pagbutang og mga imahen sa mga buhatan sa gobiyerno maoy usa ka pamaagi sa pagpalig-on sa pagtuo ngadto sa Ginoo sa mga opisyal ug kawani sa gobiyerno.
Dugang pa nila nga kun lig-on ang pagtuo sa Ginoo sa mga opisyal ug kawani sa gobiyerno dako kini og ikatabang nga mahimo silang sinsiro ug matinud-anon sa ilang pagpangalagad ngadto sa mga tawo.
Matud pa nila nga bisan sa maong kasamtangan nga kahimtang makahimo pa man gani gihapon og kasaypanan ang atong mga opisyal ug kawani sa kagamhanan labaw pa gayod unya kun makuha pa ang mga butang nga makapalig-on sa ilang pagtuo ngadto sa Labaw nga Makagagahom.
Nunot niini ilang gipadayag nga mahinungdanon kaayo sa mga opisyal sa kagamhanan ug mga kawani ang mga espirituhanong giya (Spiritual Guidance) sa pagtuman sa matag adlaw nilang kaakohan.
Kini ang hinungdan nga sa ilang pagpanumpa sa katungdanan sa dayon nga pagtapos sa mga pulong sa ilang pagpanumpa maoy gisukip kanunay ang mga pulong nga nagkanayon...“So help me God!”
Kun ihikaw kini pinaagi sa balaod nga ipatuman daw gibati usab nila ang kalisang nga labaw pa unya nga maghitak ang mga kahiwian nga mahimo sa atong mga opisyal ug kawani sa atong kagamhanan.
Hinuon adunay nag-ingon nga ang House Bill 6330 kon Religious Freedom in Government Office Act nga balaodnon mahimo hulipan og laing balaodnon nga makapalig-on sa pagtuo sa mga batan-on ngadto sa Labaw nga Makagagahom.
Kay alang kanila ang pagpalig-on sa pagtuo sa mga batan-on ngadto sa Ginoo maoy nag-una nga mga pamaagi nga maangkon nila ang hayag nga kaugmaon nga maoy tumong ug katuyoan sa Kabataan partylist.