Ang konseho sa dakbayan sa Sugbo mipalabang sa balaudnon nga nagdili sa mga ginikanan, guardians ug mga magtutudlo paghimo og corporal punishment kon pagdagmal ngadto sa mga bata.
Ang maong ordinansa nga gipangamahanan ni Konsehal Leah Japson nagtangag sa silot nga pagkabilango hangtud sa unom ka buwan ug multa nga hangtud sa P5 mil alang sa mga malapason.
Walay dautan ang pagpanalipod sa kabataan gikan sa pagdagmal kana kun gihimo sa tumong nga pagpangabuso kanila. Apan kun ang tumong sa pagpasakit sa usa ka bata gihimo, labi pa sa mga ginikanan, aron sila madisiplina ug mamahimong maayo nga lumolopyo sa nasud ugma damlag dili tingali husto nga did-an ang mga ginikanan paghimo sa matang sa disiplina nga iyang gusto.
Lain-lain man gud ang matang sa pagdisiplina sa usa ka bata. Mag-agad sab ang paagi sa disiplina sa kinaiya sa bata. Dunay mga bata nga mamahimong ipaagi lang sa pagmaymay ang disiplina apan dunay mga bata nga gikinahanglan na gyud nga pasakitan aron makaamgo sa ilang sayop.
Ug kini dili dautan, gani ang Biblia naghatag man og giya sa mga ginikanan unsaon pagpitol ang ilang mga anak.
Ang Proverbs 13:24 nagkanayon nga “He who spares his rod (of discipline) hates his son, but he who loves him diligently disciplines and punishes him early."
Tataw ang giya sa pulong sa Ginoo alang natong mga ginikanan. Nganong importante ang pagdisiplina tungod kay matud sa Balaang Kasulatan diha sa Proverbs 22:15: "Foolishness is bound up in the heart of a child, but the rod of discipline will drive it far from him."
Sumala sa pulong sa Diyos nga dili angayang ihikaw sa mga ginikanan ang pagbunal sa ilang mga anak kun makasala tungod kay way namatay sa husto nga pagbunal. Apan daghan ang namatay tungod kay sayop ang paagi sa pagpangga sa ilang mga ginikanan.
Ang Proverbs 22:6 nagkanayon “Train up a child in the way he should go: and when he is old, he will not depart from it.”
Unya nganong moinsister man gyud ang mga sakop sa konseho sa hiwi nila nga pagtuo? Dili nako mahuna-huna ang posibling mamahimong epekto sa maong ordinansa ngadto sa mga bata.
Nabalaka ko nga moabot ang panahon nga tungod sa maong ordinansa dili na morespito ang mga anak ngadto sa ilang mga ginikanan. Imagina kun ang imong anak, inay motahod sa imong sugo, sumbalikon ka na hinuon ug singhagan pa.
Unsay imong bation, dili ka makadisiplina niya sa paagi nga imong gusto. Basin og moabot ang panahon nga ingnon ka lang sa imong anak og Estoryaheeee!
* * *