Ang usa ka paagi sa pagpandong sa usa ka masakiton mao ang pag-ampo nga inubanan ug gugma. Ang pagsalig ug pagtuo angay nga huptan mao nga ang Ginoo nagmahal sa tawo nga atong gimahal ug gani labaw pa sa atong pagmamahal ug niining paagiha masinati nato nga Siya andam nga maminaw sa atong gipangayo nga kaayohan.
May mga butang nga atong mabatyagan kung isentro nato ang gugma sa Ginoo sa atong mga pag-ampo usa na niini mao ang kaayohan sa sakit ug labaw pa nga mahimsog ang panglawas. Matud pa sa doctor nga dako ang kalambigitan sa pisikal nga panglawas sa ispirituhanong aspeto sa usa ka tawo. Gani napamatud-an man nga ang tawo nga kanunay mahasol sa butang kalibutanon maoy sagad nga masakit sukwahi sa tawong tabunok sa ispirituhanong gugma.
Kung mabati na nato ang gugma sa Ginoo ang kaaghop ug kalumo ang mopuyo sa atong kasing-kasing ug tumang pagsalig nga ang Ginoo maminaw gyud. Bisan pa sa mga hilom nga pag-ampo ug labaw pa nga mahimong epektibo ang imo nga pagpandong sa masakiton.
Ang kamatayon gilatid na sa taga-tagsa nato ka kinabuhi aron makaadto kita sa atong Langitnong Amahan. Busa sa tumang pagpaubos atong dawaton ang maong kamatuoran nga dili tanan makabaton ug kaayohan. Apan may mahimo pa kita aron makuhaan ang pag-antos sa masakiton kini ang pagunit sa mga kamot ug pagpabati sa atong gugma uban sa pag-ampo sa Ginoo nga unta hupayon na ang iyang kasakitan.