Gikuninitan sa pagsupak ang balaodnon nga nag-awhag sa pagpatangtang sa mga rebulto ug mga larawan gikan sa mga opisina sa goberno lakip ang mga seremonyas sa Katoliko.
Tungod kay ang atong nasud gidominar sa relihiyon nga namat-a’g kahayag sa tanan ug di mahimong babagan ang naandang kalihukan nga gipaila sa mga Katsila nga maoy nagsabwag sa Katolisismo dinhi sa nasud.
Sa maong relihiyon gitudlo sa mga Katsila nga ludhan ug simbahon ang mga larawan ug mga rebulto ug mao kini migamot sa galamhan sa tawo gikan kaniadto hangtod karong midangat na sa 92 milyones ang populasyon sa Pilipinas.
Busa matag barangay, lungsod, siyudad ug lalawigan, nagkalainlain ang mga Santos ug mga larawan nga giludhan sa katawhan tungod sa pagtuo nga ang maong kabilin sa mga Katsila kabubut-on sa Dios.
Wa maalakanse ang daghang mga Filipino nga misandig sa ilang kapalaran sa mga larawan ug rebulto ug mga Santos tungod kay daghan kanila ang na-adunahan, naayo sa mga balatian ug mga debuenas nga nasinatian sa ilang kinabuhi.
Sa kalig-on sa maong pagtuo way tawo o grupo nga angay mogusbat niini sanglit nakataya dinhi ang emosyon, pagbati , pagsalig ug pagtuo sa kadaghanan.
Lisud biyaan ang maong pagtulon-an luyo sa kamatuoran nga sukwahi kini sa gitudlo sa Dios, ni Kristo ug mga Apostoles kansang mga pagtulon-an napatik sa Biblia.
Apan ang Dios di makita, ug si Kristo tua na sa langit samtang ang mga Apostoles nanghay-ad pa sa lubnganan hangtod karon busa wala nay motuo kanila gawas lamang sa giingon sa Biblia nga mga gihatagan og kahayag sa Dios ug nakaila sa Iyang mga sugo nga nahisulat sa Biblia.
Si Cain maoy unang kriminal, sa panahon ni Noe dyutay ra ang nakasakay sa iyang arka, sa panahon ni Moises, mga Israelitas ra ang giila nga mga anak sa Dios, sa panahon ni Kristo ug mga Apostoles dyutay ray nag-alagad kang Kristo ug sa Dios, daw unsa pa kaha karon.
Mao nga sumala sa Biblia sa pag-abot sa adlaw sa paghukom sama sa balas sa dagat ang palangyon sa linaw nga kalayo o impiyerno. Di ba?