Ang kagamhanang nasyonal ug mga lokal nagpasiugda og mga baratong balay nga programa aron ang mga tawong walay mga balay makabaton na niini. Kining baratong balay nga programa dugay na kaayong gisugdan sa kagamhanan apan nganong daghan man gihapong mga tawo sa nasud ang walay mga balay?
Nganong daghan man gihapon sa atong mga kaigsoonan ang nangatulog sa daplin sa kadalanan, sa mga aseras, sa ilawom sa mga taytayan ug nagpuyo sa mga barong-barong daplin sa kasapaan? Nasayod na kamo sa tubag.
Ang baratong balay nga programa sa gobyerno negosyo maong kadto lamang makaabot sa kantidad sa programa ang makapahimulos niini.
Kasagaran sa mga nakapahimulos sa nahisgutang programa kadto lamang adunay mga trabaho ug gagmay nga negosyo. Ang mga walay trabaho dili ug wala gayoy kahigayonan nga makapahimulos sa programa kay dili man sila makabayad niini.
Barato kuno ang programa pero hapit moabot og usa ka milyon ang kantidad niini busa dili gayod mahitabo nga ang mga nagpuyo ilawom sa mga taytayan, daplin sa kadalanan, sa mga aseras ug kasapaan makapahimulos sa mahal nga programa. Kun maglisod ang mga kabus sa pagkaon og ka usa sa usa ka adlaw tungod sa kanihit sa salapi, unsa pa kaha sa pagbayad sa hapit moabot sa usa ka milyon nga balay?
Mao unta kini ang hunahunaon ug ikonsiderar sa mga opisyales sa gobyerno kun gusto man gayod nilang motabang ug dili pakitang tawo lamang ang ilang gipasiugdahan nga mga programa o proyekto.
Sama sa luna nga gipanag-iya sa Kapitolyo nga ubos sa 93-1. Ang mga nagpuyo sa maong luna nga makaabot sa kantidad niini nalipay tungod kay maila na gayod ang luna nga gitukoran sa ilang mga balay apan ang mga nagpuyo sa luna nga dili makaabot sa kantidad nga gisita nagguol tungod kay sila papahawaon.
Kun buot gayod nga tabangan sa Kapitolyo ang mga tawong kabus ug timawa nga makabaton og gamay’ng luna ug balay nga matawag nga ila gayod nganong dili naman lang mogahin ang Kapitolyo og luna para kanila nga libre ug walay bayad ubos sa kondisyon nga dili gayod kini ipabaligya magtuwad-tuwad man ang kalibotan.
Total, ang kalibotan ug ang iyang kayutaan wala bitaw ni himoa sa Ginoo aron lang negosyohon sa nasudnon ug mga lokal nga kagamhanan.