Suga oy!!!!!!

(Dihay may edad na nga biyuda misumbong sa barangay)

Mana: Kapitan mahimo ba nga pasug-an ninyo nang poste sa may eskina kay daghan na kunong babaye nga gikuotan diha oy kay ngitngit.

Kapitan: Mao ba na hala akong ipasusi ug pasug-an dayon sa akong mga tanod.

Mana: Kapaspas pud oy, ugma na lang pataori og suga Kap.

Kapitan: Ha! Ngano man?

Mana: Musoway kog agi rong gabii(Toink!/Aguy!)

Hehehehehehehehehehehehehe!

Nadapit ko sa dasig kaayo nga aksiyon ni Kapitan Dory Emit sa Barangay Pooc Dakbayan sa Talisay pagpanuga sa mga hilit ug ngiob nga bahin sa iyang barangay. Nagpatabang si kapitan Emit pagpahibalo sa iyang mga konstituwente aron makatabang pagpahibalo sa mga lugar nga nagkinahanglan og sugang dagitabnon.

Ingon ini sab kakugihan si Konsehal Semy Cabuenas sa samang dakbayan. Gani sa bag-o nakung gipuy-an sa barangay San Isidro kang Konsehal Semy ko nakahangyo og suga sa among agianan nga nasug-an na kanhi sa barangay mismo. Sigurado kung dunay samang programa ang tanang barangay o kaha ang mga piniling konsehal sa matag lungsod o siyudad.

Apan ang pangutana, nasubay ba kaha sa matag barangay sa hingpit ang mga suga nga napunder na o kaha ang mga lugar nga angayang sug-an tungod kay peligro?

(Dihay manag-uyab)

Senyang: Ay katayming kay ngitngit diri ponder ang suga.

Bitoy: Ha! Ngano man?

Senyang: Sus! Mangutana pa gyud morag dili laki.

Bitoy: (Aguy! mao na ni, kumbati junior)

Senyang: Ari ta diri, kadiyot kay maghubo ko.

Bitoy: (Aguy!) Aw! Segi gud maghubo ta.

Senyang: HA! Nganong maghubo man ka? Mangihi sad diay ka?(Toink!/Ayay!)

Iho! Wrong number Dodong! Hehehehehehehehehe!

Usa ka tinun-an nga naghisgot naku sa nahitabo kaniya usa kahigayon sa ngitngit nga lugar maoy nagpahinumdom naku sa ka mahinungdanon sa pagsuga sa mga ngiob nga agianan.

Hinaot dili maulahi ang atong mga opisyal sa barangay pagpahiluna ining simple lang nga gimbuhaton apan dako kaayo og mahimong kaayohan ilabina sa mga tinun-an nga nagtungha panahon sa kagabhion.

(Dihay duha ka bampira)

Buloy: Bitoy usa ra gyu’y nabiktima naku gabii da. Ikaw Bitoy daghan siguro kag napaakan no kay nagkadugo pa man nang imong simod.

Bitoy: Kinsay ingon daghang nabiktima.

Buloy: Ako! Kay nagkabulingit gud sa dugo nang imong simod.

Bitoy: Kita ka paglupad nato gabii anang poste nga walay suga?

Buloy: O hapit gani ko mamumo.

Bitoy: May ka hapita ra, ako momo gyud (Toink!/Aguy!)

Hehehehehehehehehehehehe!

Ingon ana ka importante ang pagbutang og mga sugang dagitabnon sa mga agianan nga ngiob. Gawas nga mahimo kang mapakong o matikay-ang ang labing peligro ang posibilidad sa mga panghitabo nga makalilisang.

(emailad:[email protected])