Ang balaodnon nga nagdili sa mga seremonyas nga relihiyoso sa mga buhatan sa goberno, di mosaler sa kongreso.
Kini tungod kay mayoridad sa mga magbabalaod sa nasud pulos Katoliko ug kumo kay gusto nila nga masilsil ang maong relihiyon sa utok sa tawo, natural supakon nila ang mga sugyot nga mosanta niini.
Naanad na ang mga Filipino niini tungod kay mao kini ang namat-an og kahayag sa tanan.
Maayo nalang karon kay wa nay mga Katsila busa may kagawasan na ang tawo sa pagpangita og laing relihiyon.
Kay kun nia pa ang mga paring Katsila hayan nga daghan ang mamatay pareho ni Dr. Jose Rizal ug sa kaliboan ka mga irehe kaniadto pagkatapos mosaka sa langit si Kristo ug pagkamatay sa tanang mga Apostoles diin ang wa mosunod sa mga balaod sa mga pari nga mipuli sa pagdumala sa katawhan gipamatay sumala sa Biblia.
Tungod kay mao kini ang naandan sa mayoridad sa katawhan sa Pilipinas mas maayong pasagdan tungod kay wa man kini magpugos sa tanang mga kawani o kaha mga estudyante nga di Katoliko sa pagsalmot sa mga seremonyas nga iya sa Katoliko.
Kun di pa ikasuko sa kadaghanan, tungod kay demokrasya ang atong nasud, kun may seremonyas man ang mga Katoliko sama sa mga pangadye sa eskuylahan matag buntag , mas maayo usab nga hatagan og higayon ang ubang mga relihiyon nga mohimo usab og mga pag-ampo alang sa ilang mga membro nga anaa usab sa mga lawak o edipisyo nga iya sa kagamhanan matag adlaw.
Apan kasagaran sa mga eskuylahan ug mga buhatan sa goberno maihap lamang sa tudlo ang mga di Katoliko maoy hinungdan nga wa buhata sa ilang mga lider ang mga pag-ampo sulod sa eskuylahan o kaha sa mga opisina sa kagamhanan.
Busa di na angay nga hunongon ang naandang gimbuhaton sa mga Katoliko sama sa pagbutang og mga larawan ug mga rebulto sa matag lawak sa eskuylahan o kaha sa mga opisina sa gobiyerno
Ang mahinungdanon nga di pugson ang mga kabataan o kaha dagkong tawo nga mosalmot sa mga kalihukang relihiyoso nga lahi sa ilang relihiyon. Di ba?