Kabag-ohan sa simbahan

Nabag-ohan ang mga magtutuong Romano Katoliko sa bag-ong mga tubag sa Santos nga Misa nga gisugdan sa pagpatuman sa Artdisyosesis sa Sugbo duha na ka Domingo ang nakalabay.

Makit-an hinuon sa mga dagway sa mga nanimba ang pagka-bukas sa kabag-ohan nga gipatuman sa kinatas-ang awtoridad sa Romano Katolikong simbahan didto sa Vatican.

Ang simbahan bukas sa mga kabag-ohan aron ipahaum sa kasamtangan nga panahon.

Nakumbinser ko pilosopiya sa kabag-ohan sa among panag-estorya ni Fr. Nonoy Pe, OFM, nga kura paroko sa parokya San Vicente de Ferrer sa Urgello.

Matud ni Fr. Nonoy nga hasta silang mga Franciscano mihangop na sa kabag-ohan – kabag-ohan nga bisan nagsunod sa mga pagtulon-an sa ilang founder nga si San Francis de Asis, hangpon gihapon unsay maayo sa kasamtangang panahon.

Kaniadto sa dihang bata pa ko, makita nako ang mga Franciscano nga estriktong magsul-ob sa ilang habito ug capuchin (kawo) bisan magsuroy sa mga publikong lugar. Apan sumala pa ni Fr. Nonoy nga sa kasamtangang panahon, mahimo na silang maghubo sa habito aron mas maduol pa sila sa mga kabus nga maoy gialagaran sa mga sinugo sa mga Ginoo sama kanilang mga Franciscano.

Si Fr. Nonoy maoy mibunyag kang Zoe, anak nilang Jigger ug Ivy Cañedo, sa Archdiocesan Shrine of the Sacred Heart of Jesus.

Dayag ang kabag-ohan, kaniadto nga ang usa ka Franciscano dili mogawas sa Friary nga dili mag-habito, si Fr. Noynoy nag-polo nga gisapawan og casulia ug stula atol sa bunyag.

* * *

Ang kabag-ohan dili mapugngan sa tawo. Mosugot kita og sa dili, mahitabo kini. Tipik kini sa pagtubo ug paglambo sa tawo ug sa iyang komunidad.

Apan motukar gihapon ang akong pagka-“semi conservative” kun hisgotan na ang akong gihigugma nga simbahan. Alang nako, angayang hangpon ang kabag-ohan, apan kinahanglang dili makadaot sa tinuoray nga “essence” ug “substance” sa pagtuo.

Sa exposition sa Blessed Sacrament, nindot gihapon kantahon ang mga Latin nga awit sama sa O Salutaris Ostia ug Tantum Ergo.

Ang maayo gani, kantahon kanang Pater Noster, Ave Maria ug Gloria Patri.