Hilabihan ang pagbaha sa kadalanan sa dakbayan sa Mandaue dihang kalit lang nga mibunok ang kusog kaayong ulan sa dayong kaudtohon kagahapon nga maoy hinungdan nga ang mga sakyanan nga nagdagan daw walay kalainan nga tan-awon sa mga sakyanan sa kadagatan nga nanglutaw.
Daghan ang nakaingon kun nakamugna man og pagbaha sa kadalanan ang pipila lamang ka gutlo nga gidugayon nga pagbunok sa ulan sa maong dakbayan unsa na kaha kun mag-ulan ang tibuok adlaw.
Dugang pa nila nga ang mga panimalay nga nahimutang sa daplin sa mga sapa sama sa Mahiga Creek sa barangay Subangdaku, sa Butuanon River sa barangay Maguikay ug uban pa nga susama ang ilang kahimtang labing siguro gayod nga anaa sa kakuyaw ang ilang kahimtang.
Matud pa nila nga dili kaayo kuyaw kun ang kusog nga pagbunok sa ulan kanunay lamang mahitabo sa adlaw kay nagmata man ang mga molupyo ug dali alang kanila ang paghiklin kun ilang mamatikdan ang pagdako sa tubig sa ilang nahimutangan.
Ang kuyaw kun mahitabo ang kusog nga pagbunok sa ulan panahon sa kagabhion ug dili makamatikod ang mga molupyo kay nahinanok sa pagkatulog.
Kahinumdoman si Board Member Thadeo Ouano sa ikaunom nga distrito sa lalawigan sa Sugbo maoy iyang gipalabang ang resulosyon nga nagpahimangno sa mga molupyo sa kabarangayan sa paghiklin gilayon ngadto sa luwas nga lugar.
Matud pa niya dili na magpaabot nga awhagon pa sa ilang mga barangay opisyal o mga opisyal sa lokal nga kagamhanan ang mga molupyo nga nahimutang sa daplin sa sapa nga kuyaw ang pagbaha o daplin sa pangpang nga kuyaw ang pagdahili sa yuta sanglit alang man kini sa ilang kasiguroan.
Dugang pa ni Board Member Ouano nga mahinungdanon kaayo ang paghiklin sa mga molupyo ngadto sa luwas nga lugar sanglit pinaagi lamang niini kalikayan nga adunay makalas nga kinabuhi.
Sa nasayran si Mandaue City Planning Officer Florentino Nimor sa iyang pamahayag miingon nga adunay mga kanal sa dakbayan nga ilang gihabwaan sa nagsagol nga basura ug ilang namatikdan nga miarang-arang ang pagdagayday sa tubig ug gumikan niini dako iyang pagtuo nga ang pagpataka og labay sa basura maoy usa sa mga nakaingon sa pag-awas sa tubig sa matag higayon nga magbunok ang ulan. (Romeo T. Limpangog)