Mikisi-kisi si Mayor Mike Rama sa paagi ni Mayor Tomas Osmeña pagdani sa mga kapitan nga mo-uban (og balik) sa Bando Osmeña Pundok Kauswagan. Samtang si Mike nakigpinirmahay og memorandum of agreement sa mga kapitan alang sa financial assistance, si Tomas misaad nga doblehon ang budget matag barangay ug sila na sa barangay ang mo-manage alang sa medical assistance.
Matud ni Mike usa kini ka “bribery” kun panuborno. Kay matud pa niya dunay nalambigit nga kuwarta unya doblehon.
Ang pangutana niini kun makaayo ba sa mga barangay ang pamaagi ni Tomas nga ang mga barangay na ang mo-manage sa medical assistance sa mga tawo? Para nako, kun may estrikto nga polisiya niini ug “close monitoring” unya seguroon lang nga accountable kanunay ang mga kapitan ug mga opisyal nga nag-manage sa pundo, mas maayo kining pamaagi ni Tomas. Ang nakita nako, gigamyan ra si Tomas sa pundo nga gisaad ni Mike, mao nga iya kining doblehon. Kun akoy Mike, hinayhinayan usab niya kini og doble o triple hangtod mahuman iyang termino ug ato lang unyang tan-awon kinsang pamaagi ang mosaler.
Sa kaulahian, ang mga residente sa siyudad sa Sugbo ang nabulahan niining panag-atbang ni Tomas ug Mike sa 2013 nga eleksiyon kay pareho man silang mobubo og pundo ngadto sa mga tawo.
* * *
Naklaro na nga ang negosyanteng si Efrain Pelaez Jr. makig-atbang og balik ni Mayor Paz Radaza sa dakbayan sa Lapulapu.
Sama kaniadto sa una niyang pakig-atbang, iya unang gipasakaan og kaso ang mga Radaza unya siya mo-file sa iyang sertipiko de kandidatura.
Ang nakabati kaniadto, nagamit niya ang Ombudsman sa iyang pagpasikat pinaagi sa pagpa-accredit sa iyang grupo isip graft watch volunteers unya maoy gigamit paggukod sa mga Radaza.
Karon, ang korte na gyud ang iyang gigamit aron iduot ang mga Radaza. Iyang gipadad-an og “notice to sue” ang dakbayan sa Lapulapu tungod kay matud niya napakyas pagpatuman sa Solid Waste Management sumala sa gimbut-an sa balaod.
Giunsa man pagkapakyas sa solid waste management nga sa akong nahibaw-an kada semana aduna may mga lokal nga kagamhanan sa ubang lugar, mga estudyante, mga organisasyon ug mga NGO nga manganha sa Lapulapu aron mo-obserbar sa operasyon sa material recovery facility (MRF) sa dakbayan. Kun pakyas pa, nganong anhaon man sa mga tawo aron saksihan ang solid waste management program sa Lapulapu?
Naglibog ko.
Sa tanang barangay sa Lapulapu, ang barangay Basak na lang ang wala motuman sa balaod sa solid waste management. Pero sa akong nahibaw-an, ang kapitan ning barangaya nga si Belong Darnayla dili alyado sa mga Radaza. Dili kaha sabotahe ning iya, aron lang makiha ang siyudad?
Gani, ang kapitan sa Poblacion gikiha naman sa siyudad kay wala motuman sa solid waste management.