Ang Brigada Eskuwela 2012

Ang Brigada Eskwela 2012 nga gipasiugdahan sa Department of Education (DepEd) maoy paagi sa pag-andam sa mga tulunghaan sa dili pa magsugod ang klase sa kabataan sa mga publikong tulunghaan alang karong tuig 2012.

Ang mga ginikanan nga ang ilang mga anak anha motungha sa publikong tulunghaan maoy gidapit sa pagboluntaryo sa ilang kaugalingon sa pagtampo usab sa ilang pagtabang sa mga magtutudlo sa maong tulunghaan.

Daghan ang nag-ingon nga dako kaayo og bintaha kadtong mga tulunghaan nga nahimutang sa barangay nga daghang patigayon nga mopakita usab sa pagkamatinabangon sa mga tulunghaan sa elementarya o high school nga giisip nga ilang silingan.

Naglakip sa gipaabot nga ikatampo nga tabang sa mga establisamento sa kabarangayan mao ang paghatag og pintal, lansang, sin nga maoy ihulip sa nagguba nga mga atop o pagtapak sa nabuslot nga mga atop.

Gisanong sa mga ginikanan ang pagdapit sa mga magtutudlo nga mosalmot sa gipasiugdahan nilang Brigada Eskuwela alang karong tuiga sa tuyo nga ang ilang mga anak mapahimutang sa matag lawak saringan ug dili na mabalda sa pagpanglimpiyo ang unang adlaw sa ilang klase.

Matud pa nila nga dako kaayo ang bintaha ang mga tulunghaan nga adunay daghang ginikanan nga hanas sa pagpamanday tungod kay mao man kini ang tahasan sa pag-ayo sa nangaguba nga lingkoranan, motapak sa nabuslot nga mga atop ug uban pa.

Ang mga ginikanan nga misanong sa hangyo sa mga magtutudlo nga pag-apil sa Brigada Eskuwela 2012 maoy ilang gipadayag nga makaayo ang pag-ayo sa mga nangaguba nga mga lawak saringan o lingkoranan tungod kay dili man mabalda ang klase sa pagsugod unya sa ilang pagtungha.