Unsa nay gisangpotan sa kaso sa masaker nga nahitabo sa Maguindanao diin daghan ang mga kinabuhi nga nakalas apil na ang mga inosenteng taga media? Mao kini karon ang naghasol sa hunahuna sa kadaghanan. Unsaon, nahilom na man kini, wala nay kasayoran ang katawhang Pilipino kun unsa na ang lakaw sa kaso. Nahitabo kini tungod kay ang gihatagan karon og dakong pagtagad sa gobyerno ug sa atong mga magbabalaod mao man ang Impeachment trial ni Chief Justice Renato Corona. Pagka makaluluoy sa mga pamilya sa mga nabiktima sa maong masaker kun ilubong na lang gayod sa kalimot ang dugoong hitabo nga binuhatan sa mga tawo nga matawag natong mga demonyo.
Porbida bitaw ning self-interest, uy! Kun magpadala niini buhaton ang bisan unsa bisan pa kun buhat sa yawa aron lang magpabilin ang gihuptang gahom. Ug ang walay labot sa away tungod sa panag-ilog sa gahom maangin intawon.
Dugay na nga nataral sa hukmanan ang mga suspetsado sa masaker nga atong gihisgotan apan hangtod karon wala pay tinong resulta. Ang pamilya sa mga nabiktima naghulat nga mahukman na ang gituhoang mga kriminal aron maangkon na nila ang hustisya.
Pahulaton pa ba diay sila og laing mga tuig pa? Tinuod gayod nga mora’g bao ang dis-og sa atong hustisya ilabi na gayod kun ang giakusahan daghan og kuwarta ug gamhanan.
Daang-tuwid. Mao kini ang gipanghambog ni Noynoy ilabi na sa panahon sa kampanya kaniadto. Apan sa akong tan-aw, mora’g nagsubay pa gihapon karon ang iyang gobyerno sa daang-baluktot.
Tinuod nga iyang gipakita sa katawhang Pilipino ang kasuko niya sa graft and corruption. Tinuod nga nakig-away ang iyang gobiyerno batok sa grabeng pagpangawkaw sa salapi sa nasud. Apan ang kahinay sa dagan sa hustisya sa nasud nagpadayon ug wala gihapon niya madala ngadto sa tul-id nga dalan.
Ug ang timailhan niini atong makita sa karong paghusay sa mga suspetsado sa Maguindanao massacre nga wala pa gyod masiloti.