Junjun Osmeña pormal mideklarar

Dili na lang unta liko-likoon sa kampo sa depensa, maayong ila na lang gyud ipresentar si Supreme Court Chief Justice Renato Corona sa Senado nga padayong naminaw sa impeachment nga iyang giatubang.

Tibuok ang tingog sa publiko nga buot makadungog sa tingog gikan mismo ni Corona mahitungod sa iyang mga peso ug dollar accounts nga wala niya ideklarar sa Statements of Assets, Liabilities and Net Worth.

Usa pa, kaniadto pa sa pagsugod sa impeachment trial nga mismo si Corona ang miingon kanato nga iyang ibutyag ang iyang mga bank accounts. Higayon na karon nga iyang tumanon ang iyang panaad nga moatubang sa publiko aron iyang ipasabot ang iyang ka-adunahan nga wala na motupong sa iyang kita isip opisyal sa gobyerno.

* * *

Kagahapon, pormal na nga miitsa sa iyang kalo sa politika si Renato “Junjun” Osmeña, ang junior ni kanhi Bise Mayor Renato Osmeña, aron isumiter iyang kaugalingon sa proseso alang sa south district sa dakbayan sa Sugbo. Sa iyang mga pamulong kagahapon atol sa iyang formal launching sa iyang kandidatura sa Abuhan Dos sa dalan Ramos, klaro nga adto siya mosumiter sa iyang kaugalingon sa Bando Osmeña Pundok Kauswagan (BOPK), ang grupo sa dakbayan sa Sugbo nga gipanguluhan sa uyo-an ni Junjun nga si Kongresista Tomas Osmeña.

Si Junjun maoy katapusan nga mideklarar sa iyang intensiyon pagpapili isip kongresista sa south district. Kun madayon, iyang makaatbang silang kanhi Kongresista Antonio Cuenco nga uyo-an usab ni Junjun (sa side sa mga Veloso), kanhi DOTC Undersecretary Totol Batuhan, Konsehal Margot Osmeña ug Konsehal Bebot Abellanosa.

Usa ka maayong materyal nga masuwayan sa mga residente sa south district si Junjun Osmeña, apan tataw sa kalihukan kagahapon nga sugodsugod pa lamang kadto sa iyang pagpanguyab sa botos sa mga taga-habagatang distrito sa dakbayan. Tungod kay buot man ni Junjun Osmeña nga adto magpasakop sa BOPK, kinahanglang iyang makuha ang atensiyon sa iyang uyo-an nga si Tomas, ug iya kining makumbinser nga sibo siya sa posisyon nga iyang daganan.

Ang akong tambag ni Junjun, iya nang ilhon ang mga botante sa south district. Makadaghan na nanguyab si Atan Guardo sa south district, gani minilyon ka pesos ang natabang niya sa mga botante sa maong distrito, apan daw kulang gihapon kini. Adunay mga isyu nga kinahanglan sugaton ug tubagon sa usa ka kandidato sa south district nga sama kang Cuenco, mituhoy lamang paingon sa kadaogan.

Dili ko moingon nga maglisod si Junjun Osmeña. Tungod kay hasta siya nasayod nga nagdepende ra gyud sa mga botante ang tanan. Busa, anaa si Junjun Osmeña karon sa ang-ang pagsulay sa bul-og sa politika sa south district kun kaya ba gyud niya.