Daghan kaayo ang nangutana kanako kun unsa nga matang sa motorcycle crash helmet nga angay’ng isul-ob aron dili sila madakpan kun sugdan na karong Agosto 1 ang hugtanay’ng kampanya batok sa dili tukma nga crash helmet.
Nakakita ko sa hulagway sa maong mga crash helmet basi sa gilatid sa Department of Trade and Industry (DTI) aron pagsiguro nga kun makasugat og aksidente ang magsakay’g motor, dili kaayo mabuak ang iyang ulo.
Tambag nako niadtong nagplano sa pagpalit og crash helmet nga ang paliton ninyo mao kadtong helmet nga motabon gayud sa tibuok ulo ingon man moproteher sa suwang.
Kun half-face helmet, mahimo ra usab apan kadtong helmet nga matago hangtud ngadto sa liog ug matabunan ang dapit sa dunggan. Kining helmet nga maoy sagad gisul-ob karon nga magpatong ra’s ulo, dili na kana dawaton.
Kadtong duna nay mga mahalon nga crash helmet, ayaw kabalaka kay dad-on ra kana ninyo sa DTI aron nga papitlan og sticker. Ang bayad barato ra kaayo, mora’g P1.50 ra nga pangbawi sa gasto paghimo sa sticker.
Mora’g ang uban mag-isip nga ang gihimo sa kagamhanan usa ka paghasol-hasol sa mga magsakay og motor, apan ang tinuod gusto lang sa mga opisyal sa kagamhanan nga maprotehean ang mga sumasakay og motor.
Alang kanako, kun sugdan na gani sa pagpatuman ang estrikto nga pagpanakop sa dili magsul-ob og crash helmet, angay lang usab nga hingusgan na usab ang pagpanakop sa mga dili magsul-ob og helmet.
Gihisgutan nako kini dinhi sa atong lindog aron nga makabantay kadtong mga igsoon nato nga motorista, sama kanako nga usahay magsakay usab og motorsiklo.
* * *
Dili layo ang posibilidad nga ang anak sa mayor sa dakbayan sa Carcar gipatay sa mga sakop sa kontra niini nga fraternity. Sakop gud siya sa Alpha Kapha Rho (Akrho) mao nga dili mawala kanato ang pagduda.
Kini gud nga fraternity, sori sa mga higala nako nga sakop aning pundoka, kanunay lang malambigit og kagubot. Nindot man kun sakop ka og mga grupo apan kini gud nga pundoka, kanunay makasugat og away sa karibal nga fraternity.
Unsaon nga ang uban magsul-ob man og mga sapot nga makapasuya tan-awon, sama anang lubus itum nga T-shirt ug karsones nga piting kaayo ngadto na sa bitiis, dayon magbakus og stainless, unya ang dunggan ug usahay ilong, dunay areyos.
Ang linihokan, makapasuya gayud kaayo. Mao kana nga kitang mga ginikanan nga makabantay sa binuang sa atong mga anak, badlongon nato sila. Sa kaso hinoon sa anak sa mayor, wala ko masayud kun ingon ba usab niini ang iyang gihimo.
Dunay mga ilado kaayo nga opisyal sa kagamhanan ug mga professional nga sakop aning pundok sa Akrho, apan mga tarung man sila. Nasabtan nako nga ang mga badlongon mao kadtong mga kuwang og salabotan.
Miingon ko nga kuwang sila og panabot kay wala man sila makahuna-huna nga sa gihimo nila nga pagsul-ob og piting nga sapot, pagbutang og areyos sa ilong ug dunggan bisan sila lalaki, ug uban pa, makapasuko sa ilang karibal. Buyno, atong awhagon ang kapolisan nga paspasan nila pag-imbistigar aron madakpan dayon ang nagpatay sa anak sa mayor.